Aizawl April 19, 2023 : Nizan khan Directorate of Sports & Youth Services Department buatsaih 'Incentive Cash Award 2020-2021' hlanna neih a ni a infiammi 109 hnenah Cheng 44,88,150 sem ral a ni.

Incentive Cash Award 2020-2021-hi infiamna discipline hrang hrang 11 - Taekwondo, Muaythai, Shooting, Arm wrestling, Table Tennis, Boxing, Motor sport, Sepaktakrow, Kick boxing, Weightlifting leh Football-a medal la te an ni a, lawmman dawng te hi infiammi 109 leh official mi 14, an vaiin mi 123 an ni. heng discipline a medal lak zat hi 199 a ni.

Incentive Cash Award sem zat hi a vaiin Rs 44,88,150 niin kum 2020-2021 chhunga medal dawngtute hnenah Rs 22,88,150 leh kum 2022-a buatsaih Khelo India Youth Games 2021-a tel medal dawngtute hnenah Rs 22,00,000 pek a ni.

Incentive Cash Award 2020-2021 semna inkhawm hi Vanapa Hall-ah neih a ni a, Sports Minister Robert Romawia Royte chu khuallian niin Award semna a nei a ni.

Khuallian chuan Award sem tak chu medal-la nazawng te dawn theih a ni lo a, Incentive Cash Award Scheme-hnuaia thlanchhuah te chauh in an dawn theih thu a sawi. Mizoram sawrkarin infiammite hamthatna tur kawng hrang hrang a ngaihtuah thu sawiin, Incentive Cash Award Rules 2001 chu siamthat niin kum 2022 khan Incentive Cash Award Scheme tih a ni ta a ni, a ti. Mizoram-in medal tam zawk a lak theih nan medal tamna sports uar zawk a kalpui a ngai nia a hriat thu sawiin a bik takin athletics, swimming leh archery-te chu mizo thalai tamzawk ten luhchilh se a duh thu a sawi.