Khawvel huapa lang phak infiammi te harsatna  tawh thin nia i hriat han ngaihtuah teh. Training schedule hahthlak tak tak te, match-a chak lo zawk nih te, inhliam te leh mimal harsatna hrang hrang chu an tuar ve thin ngei ang. Hmeichhia an nih chuan ei leh in mumal lo bakah thlasik lai phei chuan hriselna lamah harsatna an tawk nasa zual ngei ang. 

Tun tumah chuan infiammi 4 atangin an harsatna tawh dan leh chumi atanga hnehna changa hlawhtlinna tlangchhipa an din tak dan kan tarlang dawn a ni. An chanchin hian i hma hunah i nun a tichak ngei ang. 

1. Kieran Behan, Gymnast
Doctor hnen atangin,"I dam chhungin kein i kal leh tawh ngai lovang," tih tawngkam dengkhawng dawng ta la. Engtin nge i dawn sawn ang le! Kum 10 mi lek a nih laiin Behan chu cancer natnain a tlakbuak a, zai niin an zai hlawhtling tehchiam lo. An zaina vang chuan a nerve lamin a chhiat phah a, amah zaitu Doctor te pawhin a ke hmanga a kal leh an beiseipui tawh lo. 

Gymnastic a tuipui lai tak niin Olympic champion nih chu a suangtuahna leh a mitthla ber thin a ni. Mahse, tunah chuan mahni ke hmang pawhin a kal thei tawh lo, pian phunga rual ban lo a ni ta der mai si. A thil tum leh nih chak chu wheelchair a thu chungin a mitthla a, ke hmanga a kal leh thei pawh chu beiseina ram chauh a ni ta.

Kieran chuan damna chang leh turin kawng thui tak a zawh a ngai dawn a, thla 15 chhung zet wheelchair-ah a awm ta der mai. Mahse, naupang tawrhchhel leh huaisen a nih zia lantir ngei a duh a, nasa taka a beih hnuin gym lamah a kir leh thei ta. Mahse vanduaithlak takin thla engemaw zat hnuah chuan hmun sang tak atanga tla leh hlauhin a lu-ah hliam na tak a tuar a, hu rei tak chhung a chawl leh. 

Kum khat chhung zet chu tiang a inhawl chungin school a kal a, chumi hnu chuan gym  lamah a kal leh. A nun hmasa a phak loh em avangin a classmate-te pawhin hmusitin an nuihzat thin hle a ni.

Mahse, a nun hmasa ang nei let leh turin chhel takin a bei fat fat a, accident rapthlak tak a tawh atang a kum thum-ah chuan a ruh tliak te a lo dam fel leh ta a, infiamna lamah a lut leh thei ta. 

European Championship khel tura thlan a nih hnu lawkah a khup a rawn nain a hliam leh ta, hemi tum hian Behan pawh a beidawng ve hman lek lek a, mahse a thil tum leh nichak chu mitthla reng chungin beidawng lovin hmalam a pan leh a, kum 2011 a rawn hre chhuah meuh chuan challenge World Cup floor champion a rawn ni thei a, a tawpah phei chuan a chak ber London 2012 Olympics-a tel tura thlan chhuah zingah a tel ta nge nge a ni. 

2. Michael Jordan, Basketball
Michael Jordan hi a game khelhah chuan a chungnung hle a, tun thlengin basketball player ropui ber tia sawi a la ni fo thin. A hlawhtlin nachhan bul ber chu a hlawhchham fo tawh vang niin a sawi. Chutianga a hlawhchhamna chuan ti beidawng ve mai lovin tumruhna a siam hlauh thung a ni. A naupan lai atangin basketball hi a khel ve ta naa a hlawhtlinpui tur a nih tun an reng phak lo. 

An high school basketball team-ah pawh tel phak lovin chhawk zingah a tel a, game 300 zet chak lovin game khatah shot vawi 26 te a lut lo mahse a beidawn duh miau lovin vangin mi hlawhchhamah a inchhiar ngai lo. Champion tam zawk hi hlawhchhamna ruam atanga hlawhtlinna tlangchhip-a lawn chhuak an ni a, chung zingah chuan Michael Jordan pawh hi chhiar hmaih chi a ni lo. 

Michael Jordan chuan,“Hlauhna hi mi thenkhat tan chuan daltu a ni tih ka hria a, mahse ka tan chuan bumna mai a ni... Hlawhchhamna hian hun remchang tha lo awm tur tawng turin nasa zawkin min beih tir zawk hlauh thin," a ti.

3. Bethany Hamilton, Surfer
Bethany Hamilton hi Hawaii-ah a seilian a, chuvangin kum 7 a nih meuh chuan tuifawn-ah surfing a ti thei der tawh. Kum 2003 khan a chungah thil rapthlak tak a thleng a, a kut veilam chu shark-in seh sakin hliam natak a tuar a, a kut veilam a chan. 

A hliam te a dam hnu chuan thutiam pahnih a siam ta a. A hmasa zawk chu a vanduaina rapthlak tak tawh vangin lungngaiin a indawm kun lo vang a, a pahnihna chu surfboard-ah a chuang leh ngei dawn tih a ni. A thil tawn ang hi mi tam zawk tan chuan beidawnna leh hlauhna siamtu a tling ngei ang. Mahse Bethany Hamilton-i tan erawh a ni lo. Ni 26 chauh a liam hnuah chuan surfing a nei leh ta! Tunah chuan khawvel hmeichhe surfer thiam zual 50 zingah a tel phak leh tawh a, NSSA National Championship-a Explorer Women’s Division-ah lawmman pakhatna a dawng thei bawk.

One armed surfer anga a hlawhtlin hmain harsatna tam tak a paltlang a ni. A rualbanlohna nena a insiamrem lai khan lungngaihna nasa tak hun a nei a. He accident hian hun harsa tak a hneh theih nan a pui hle a mahse a chung berah chuan hun hlauhawm tak takah a hlauhthawnna hneh dan tur a zirtir a ni. A dam chhung hun tam zawk chu taksa peng tan tawh naupangte tana entawn tlak tak ni turin a hmang a ni. A Friends of Bethany charity kaltlangin hmeichhe tam tak, taksa peng leh tleirawl lai tawk mekte tan chuan infuih tharna a ni ta a ni. AnnaSofia Robb leh Dennis Quaid te hian Bethany-i thawnthu mak tak aṭanga infuih tharna film Soul Surfer (2011) an chang tawh a ni.

4. Muhammad Ali, Boxer
     “Risk la ngam lo khawpa huaisenna neilo nunah engmah a tihlawhtling tak tak thei lo,” – Muhammad Ali

Boxer piang tawh zinga ropui ber a ngaih Muhammad Ali hian Golden Glove vawi tam a dawn tawh bakah 1960 khan Rome Olympic Gold medal a lo awrh tawh bawk a ni. A career leh a nunphung hmangin mi tam tak a fuih tawh a ni. Ring aṭanga a chawlh hnuah pawh a nun chu midangte tan a hmang chhunzawm a, mi harsate tan thilpek tam tak hlan thinin a bik takin a natna vei Parkinson natna vei tan a thawh hlawk em em a, mihang te zalenna kawnga mi thawhhlawk tak a ni bawk. Muhammad Ali hi kum 12 mi lek a nihin mi pakhatin a bike a ruksak vangin rukru te hmachhawnna turin insual a zir hial a ni. 

Infiammi tam tak chuan famkimna leh hlawhchham hlauh vangin harsatna tam tak an tawk thin. Chuvang chuan an theihna tak tak an lan chhuahpui zo lo fo thin. Muhammad Ali erawh chutiang mi a ni ve lo va, huaisen takin a tana tha nia a hriat lamah chhel takin a kal hmiah a, khawvel-in infiammi ropui zingah a chhiar hmaih ngai ta lo a ni.