Aizawl: MIFCO Chairman PC Zoram Sang-liana chuan, “Infiamna hi tunlai khawvelah eizawn na a tling tawh a ni,” a tiin a sawi. 14th Kolasib Inter-Office Sports Meet kharna inkhawm, Zirtawpni kaltaa Hmar Veng YMA Hall-a neih a hmanpuinaah he thu hi sawiin PC Zoram Sangliana chuan, “Infiamna hi mahni bakah chhungkaw chawm nana hmang Mizoramah ngei pawh an awm fur tawh a, mi tumruh tan chuan hlawhtlinna kawng a awm zel a ni,” a ti. Infiamna kawngah Mizoram sawrkar pawhin kawng hrang hranga hma a lak thu sawiin phul lem (Artificial grass) mai bakah khaw hrang hrangah Sports Indoor Stadium te an sa chho mek a ni tiin tun dinhmunah pawh Kolasib khawpui chhunga Venglai ah Kolasib mipui hman tur Multipurpose Hall sak a nih tur sawiin, a thawktu/satu tur leh a sakna tur sum pawh peih fel tep a nih tawh thu a sawi. Inter-Office Sports Meet-ah hian Kolasib a Department Office hrang hrangte chu Group 4 (Group A, B, C leh D) ah then an ni a, a pum puiah Group S.P. & Allied chu an champion a, khuallian hian Team Champion leh mi mal lawmmawn late hnenah lawmpuina trophy a hlan nghal a ni.