Aizawl April 7, 2022:   Mizoram Information Commission chuan Right to Information RTI dan kalpui chungchanga an hmalakna MIC a thehlut lo sorkar department lianzual 10 te chu Chief Information Commission hma ah an inlan.

Mipuiin awlsam zawka Public Authority/ department te hnathawh an hriatna tur point 17 an website-a tarlang lo department thenkhat te chu Mizoram Information Commission (MIC)-ah inlan tura koh an ni. Nimina MIC in thuchhuah a siam tarlan danin, RTI Act, 2005 Section 4 (1)(b) chuan Public Authority/ department te chu an hnathawhna chungchang mipuiin awlsam zawka an hriat theihna tur point 17 tarlangin an office website-ah theuh dah ngei turin a lo hriattir tawh a ni.

Nimina Sorkar department lianzual 10 koh te hi, Agriculture Dept, Health & Family Welfare Dept, Department of Personel & Administrative Reforms (DP&AR),Public Works Dept (PWD), Finance Dept, Social Welfare & Tribal Affiars Dept, Police Head Quarters PHQ,Power & Electricity Dept (P&E), School Education Dept, leh Higher & Technical Education (H&TE) Dept, te an ni a,  Hemi bawhzui nan hian MIC chuan January 19, 2022 khan order a tichhuak a, office hrang hranga Departmental Appellate Authority (DAA) leh State Public Information Officer (SPIO) te chu RTI Act, 205 Section 4 (1)(b) in a phut angin Suo Moto disclosure ti vek tur leh Februay 28, 2022 aia tlai lovah an hmalakna te Secretary, MIC hnena thehlut turin a hriattir a. Chief Secretary, Government of Mizoram pawh order copy pek niin sawrkar department ten an zawm ngei em tih loh hriatpui tura ngen a ni bawk.

Office 130 chuang hnenah he order hi semchhuah a nih laiin office 40 chauhin an hmalakna an thehlut a. A rawn thehlut ve lo zinga department lian zual 10 te chu MIC-ah inlan tura hriattir an nih angin Lalnunmawia Chuaungo, Chief Information Commissioner leh Zorammawia, Information Commissioner te hmaah nimin khan an inlan a. Head of Department leh SPIO te chu RTI Act Section 4 (1) (b) in a phut angin mipuiin zawh kher ngai lova an department hmalakna leh an hnathawh chungchang an website ah dahchhuak ngei tura hriattir an ni. Harsatna an neih pawhin inthlahrung lova Mizoram Information Commission be rawn turin an chah a, an website ah an dah ngei em tih Mizoram Information Commission chuan a endik zui zel dawn tih hriattir an ni bawk a ni.