R.Zomawia

Awlsam taka inkai theih, tunlai khawvel hri leng, Covid-19 hian kan ram zim tê pawh min luhkhung mek a, min chhuahsan a la tum lo hle. Damdawi thiamna hmanga han beih chi vak lah ni suh. Ralthuam hlauhawm ber ber nena han beih chi pawh a ni lo va, a invenna tha nia kan hriat kan kalpui mek hi tuna kan tih tur awm chhun chu niin a lang. Chu chu mi dangte nena inkalpawh tam loh hi a ni. Duh dan tak phei chuan eng emaw chen pawn chhuak lo ila, mahni in chhung lumah tawm thap ila, thuneituten mipui mamawh tur hi mumal takin kalpui se. Mipuiten ei tur kan tlakchham lohna tur leh ram mipuite kan buai lohna turin State pawn atanga kan mamawh erawh lut reng thei bawk se tih hi a ni. He inkharkhipna hi boruak an awm tirh kha chuan khauh taka kalpui a nih kha. Tunah ve lem Covid-19 an pung ta viau mai a, kan va inthlahdul leh si ve tih hi mi tam tak zawhna pawh a ni. Thuneitute lam atang chuan ngaihtuah tur tam tak a awm a, a pawimawh ber chu ram sum leh pai dinhmun chhe lutuk tur hi an thlir lo thei lo a ni. Tunah pawh hian nasa takin sum dinhmun a tla chhe mek tih hi chu kan hmu vek awm e.

Khawpui Total Lockdown A Ni: Positive ni awma hriat chuan tu emaw dawrah thil a lei a, a hnuah hriat chhuah leh a ni. Positive chu veng chhungah leh hmun dang dangah a kal tih hriat a ni a. Chu chuan boruak a tirip nghal a. Inchhui chianna turin veng chhung pawh local task force hovin an lockdown nghal a, chutiang bawk chuan tunlaiah veng hrang hrang kan inrin loh laiin total lockdown a ni nghal zut zut mai a ni. He boruak kal zelah hian sorkar lam hotute pawh an thu khawm nghal rum rum a, Aizawl Municipal Area chhungah ni 16.8.2020, zan dar 8 atanga zing dar 4:30 thleng total lockdown puan nghal a ni. Khauh taka kalpui nghal a ni. Heta tanga ngaihdan lo awm thei ta chu Covid-19 hri hian kan khawtlangah ngei bu rawn khuar a tum tan ta em ni? tih hi a ni. He hri hi khawtlangah kai kan lo awm fur tawh nge lah hriat zuk ni suh. Engkim mai hi inrinhlelhnain kan khat zo ta. Sipaiah positive tam tak hmuh chhuah an ni a, a rama cheng, tualchhung mi-ah pawh hmuh an ni chho tan a. Hlauvin kan phi ruai hlawm ta mai a nih hi. Thihna em erawh a la thleng lo. Hetih lai hian he hri enkawlna ah hian khawvel chuan hma a sawn ve zel a, dam chhuak pawh an pung chak sawt hle a ni. Khawpui total lockdown hi a rei si loh chuan he hri chak tak mai, hmuh theih mai si loh, a kaia te ngei ngei pawhin kai tih inhriat mai harsa hi engtin nge kan do chhoh zel ang? tih hi inzawhna a ni.

Thu Kan Awih Tak tak Em? Kan Hlau tak tak Em?: State dang dinhmunte TV atangin kan en thin a, thuawih lo tak tak hmuh tur an tam thin mai. Covid-19 pawh hi an pung chak hle nia ngaih a ni. Keini ram hi han thlir ve ta ila, a tlangpui chuan thu kan awih ni chuan a lang. Veng tinah local task force din a ni a, hengte hian mahni hah pawh sawi lovin theihtawp tak meuh meuh an chhuah a, hri darh zel tur venna tha ber rih chu pawn chhuah loh a ni tih hre rengin pawn chhuak tur an veng a, an hah hle a ni. Danin a phal loh chu a tlangpui thuin kan tilui lem lo a ni. Heng karah hian han sawi tur ting chuan khawi khawiah emaw a ruka lo chhuah tum tlat te, a ruka lo chhuak thei maite hi an awm ve tho a ni. Thil ngaihtuahawm tak leh hlauhawm tak chu zu zawrhna hmun tia mi tinin kan hriat, Rangvamual leh Phunchawng hmun khu a ni. Khu hmunah khuan total lockdown lai pawhin zu duhho chu a rukin an thleng thla thei zelin a rinawm. Kawng pumpelhna lah hi an hre thei phian zel bawk si a. Mi tam tak thuawih kan awm lain thuawih lo tlem te pawh lo awm se, khang thuawih lote khan he hri hi lo kai ta se. Thuawih tak takte kha awlsam tetein a kai mai dawn tihna a ni. Thuawih hi a pawimawh em em a, damdawi tha tak a ni tih hi kan pawm thlap tur a ni.

Total Lockdown thlahdul a nih laia kan chet vel dan ngun taka ka thlir vang vangin invenna lam hi kan rilru-ah a lian em em lo em ni aw? tih vang vang chang ka nei. Hmun thenkhat tam zawkah kan awm khawm tel tel a, vantlang awmna hmunah mi 5 aia tam awm phal ani lo tih hi hmun tam zawkah chuan kan ngai pawimawh lo. ‘Social distancing hi i vawng nung hram ang u’ tih a nih laiin hnai deuh deuhah kan indinchilh a, social distancing zawm loh avanga inchawitir hi a tam em aw? Hmui leh hnar tuam loh avanga inchawitir hi chu a tam niin a lang. Kan hre zut zut thin. Social distancing zawm lo mi tam tak hi Rs.200 hi an chawitir zel ang em aw? Chawitir loh hi a tam zawk an nih ka ring ve ngawt a. Total lockdown thlahdul avanga kan inthlahdul ve zel chuan hri hlauhawm tak tia kan sawi hi kan hlau tak tak lo em ni?

Frontline Worker-te Hi A Bik Taka Enkawl Ni Thin Se: Covid-19 in min run a, hri kai, inhnamhnawih nia hriat thlenga lo buaipuitute chu a hmatawnga a tak taka hnathawkho, frontline Worker kan tihte hi a ni. Heng hnathawkho zahawm tak tak hi duat pawh an phu a, a bik taka enkawl pawh an phu hle a ni. An dinhmun a hlauhawm em em bik a ni. Tuma tih châk loh hna an thawk tih kan hriat reng a pawimawh awm e. ‘Mahni hna a ni a, an thawk tur alawm,’ kan ti mai thei, a dik; mahse, hna thawh châkawm lem lo, mi tinin kai kan hlauh em em buaipui reng ngai an ni.

A bik taka enkawl an ngaih lehna pakhat chu mipui zingah chetla lo se tih hi a ni. An hnathawhna hmun bulah emaw remchangah frontline worker te hi a bik taka awmna siamsak se. An haw dawn emaw, an chhuah dawn emaw reng rengin uluk taka check vek hnu, a him ngei e tih chauhte hi chhuah ni thin se tun ai hian kan buai lo zawk mai thei a ni. Hetia a lan dan maiah chuan positive an han buaipui char char a, an hah hle a, chutah chawlh hun, mahni in lama haw hunte a lo awm a, thian tha leh thenawm khawveng leh hmun hran hranah pawh an lo leng ve thei. Hengah tak hian Covid-19 damlo buaipui reng chu eng ang pawhin fimkhur sela, kai a awlsam em avangin kai palh thil awm thei a ni. An ni atanga kai anih vaih chuan kan khawtlang-ah awlsam tein kan kai tawh mai dawn niin a lang. He natna hi a hlauhawm -na chu a kai ate pawhin kai nih an inhre lawk lo thei tlat hi a ni. A lan chhuah dan lah hi taksa la chak lai tan phei chuan palzam mai mai awlsam tak a ni leh nghal. Chuvangin hetiang lama a bik taka hnathawktute hi fimkhur zual a ngai hle a ni.

Veng Chhung Total Lockdown: Hri kai dan hi uluk taka a tir atanga inenkawlna leh ruahmanna tha a awm loh chuan tuna kan tih ang veng chhung total lockdown thut thut hi a awm reng dawn niin a lang. Frontline worker-a thawkho zawng zawng hi a tir atang khan uluk taka an thawh dan tur hi ruahmanna fel awm sela tun ai hian kan ziaawm a rin theih. Tunah chuan positive tutute emaw kha hre chhuakin an kalna leh an veng chhui ngai a nih dawn avangin phili chung chungin an kalna, an awmna veng lockdown an puang leh hmak ang a, chutah an lo negative chuan an han thlahdul leh ang a. Kha veng chhung thoah khan hmun danga positive kha lo kal ta se, a nih loh pawhin veng chhung ami khan positive sulhnuah kal ve ta se, a ngaite bawkin vengchhung total lockdown kan ti leh ang. Veng tin total lockdown chhawk zak zak mai dawn tihna a ni ber e. Hmannia thutkhawmnaah khan December kan thlen meuh chuan kan ramah Covid-19 vei mi 5,000 kan tlin an rin tawh thu sawi lan a ni. Sawrkar a chet vat vat a ngai a ni. Covid-19 vei hi kan zingah tunah hian an awm tan mek, hei hi a darh huk thei dinhmunah a ding a. Fimkhur a ngai tak meuh meuh a ni. Covid-19 hri leng meka kan chak lohna pakhat chu kan inthlahdul hma lutuk a, kan ngaih a sam hma lutuk hi a ni. A changin kan phili leh vut a, hlauh tur laka invenna pawimawhah kan ngaih a sam leh lawi si hi a ni. Vawilehkhatah thil hi kan ti thut thut a, kan inthlahdul leh mai thin hi kan inenfiah a ngai. Tuna damdawi tha ber chu thuawihna hi a ni. Inah i tawm peih ang u. I za ruai ruai lo vang u khai!