DOWNLOAD OUR APP

Read latest news on your phone
play-store app-store
app-store
Inkharkhip leh inhnaihchilh loh; hmai tuam leh thianghlimna
titi ZALEN
Jun 07, 2020
ad
  • Rochamliana, Mission Veng
  • Kum 1914-ah khawvel Indopui I-na a intan a, kum 1918-ah a tawp a. Indopui a tawp rualin khawvelin harsatna namenlo a hmachhawn zui a, chu harsatna khirhkhan thlentu chu H1N1 Influenza A virus avanga hripui leng, ‘1918 Flu Pandemic’ tia koh, ‘Spanish Flu’ tia khawvelin a hriat lar tak kha a ni.
  • Khawvel pum dapa hripui leng hian thlen phak lohna hmun a nei tlem hle a, thliarkar pilril tak takte pawh a luhchhuak deuh vek niin mithiamten an sawi a, mak pawh an ti viau nghe nghe a ni. He influenza hripui hian Mizoram pawh a rawn thleng ve a, kum 1918 November thla velah Mizote zingah kai an awm tan nia sawi a ni a; Mizoram pumah a darh chhuak vek niin an sawi nghe nghe a. A zual zawpui vailenhlo tih ang hrimin chu hripui leng chu Manipur atanga khualzin lo hawte rawn kai haw Zawnghriin a zui a. A tuar nasa ber khua Hriangtuinekah chuan an thih tam ber tumin nikhatah mi 24 zet an thi niin an sawi hial a ni.
  • The Smithsonian Institute-in a tarlan dan chuan Spanish Flu hian thawh (wave) 3-in khawvel a tuam a. Zirtu thenkhatte zingah, “Thawh (wave) 4 lai a ni zawk e,” ti an awm bawk a. The Smithsonian Institute sawi dan chuan Thawh 1-na chu kum 1918 thal laiin a thleng a, Thawh 2-na chu kum 1918 favang laiin a thleng a, a Thawh 3-na chu kum 1919 thlasik laiin a thleng thung a. Spanish Flu hripui leng avang hian khawvel pumah mi maktaduai 50 chuang zet an thi nia sawi a ni a, zirtu thenkhatte phei chuan thi zat hi mi maktaduai 100 pawh an tling mai thei niin an sawi hial a. Indopui 1-na leh Indopui 2-na leh Holocaust (Hitlera’n Judate a suatna) a mitthi zawng zawng belhkhawm aiin Spanish Flu avanga thi zat hi a tam zawk niin an chhut nghe nghe a. Engpawh chu ni sela, a rapthlak thawkhat hle a ni!
  • Spanish Flu hripui leng chungchang sawi anih changa mithiamten entirna atana an tarlan fo thin chu — America rama khawpui pahnihin he hripui an lo hmachhawn dan inang lo lutuk leh an tawrh dan inthlauh tak zia chungchang hi a ni a, chung khawpuite chu khawpui upa tak pahnih Minneapolis leh St. Paul khawpuite an ni. Minneapolis leh St. Paul khawpuite hi Minnesota khuaa khawpui inhnaihte, a thianga awm an ni a, chuvangin ‘twin cities’ tia hriat lar an ni nghe nghe a. An inkarah Mississippi luipui hlun tak chu a luang a, luipui hian an inkar hi a luan tlang vek lo deuh va; Minneapolis khawpui chhimchhak lai leh St. Paul khawpui thlang lam mel 2 leh a chanve velah phei chuan he khawpui pahnihte hi daidangtu hranpa awm lo vin a inzawm niawm tak a ni.
  • Spanish Flu hripui len laia Minneapolis khawpuia an Health Commissioner chu Dr. H. M. Guilford a ni a, St. Paul khawpuia an Health Commissioner chu Dr. B. F. Simon a ni. Dr. Guilford-a chuan khawlaia mipui chhuahvah chu khap nghal tulin a hria a, punkhawmna hmunte pawh khar a duh a, ‘inkharkhip’ nghal a duh a ni. Dr. Simon-a erawh chuan chutianga hmalak chu thil tul lo tak niin a hria a, tul uk lo va mipui tih chiaina mai tur niin a hria a; hri veite dah hran chu a tawk thawkhat hle niin a ngai thung a. St. Paul Health Department leh Minnesota State Board of Health pawhin Dr. Guilford-a inkharkhip rawtna chu an thlawp lo hle a. Langsar taka dotu zinga mi, Minnesota State Board of Health-a Secretary Dr. Bracken-a phei chuan, “Inkharkhip ila engtikah nge kan inhawn leh chuang ang? Inhawng leh tho si ila, inkharkhip chu engnge a sawngsawhlawtna?” tiin mipui vantlang hmaah zawhna a siam nghe nghe a ni.
  • Sikul khar tur anih leh nih loh thuin inhnialna nasa zawk a chawkchhuak zui a. Dr. Guilford-a ngaihdan zawmin Minneapolis lam chuan an sikulte chu kum khat leh a chanve vel, Spanish Flu len chhungin tumhnih, rei fe fe an khar hman a, St. Paul lam erawh chuan an sikulte an hawng rei hle. St. Paul lamah mitthi an pun nasat tak avangin an chanchinbu pakhat Pioneer Press phei chuan, “Van hming chhalin kan ngen a che u; eng emaw tal chu ti hram teh u!” tiin thuneitute a kar ta hial a. St. Paul Citizen Committee nawrna angin, tlaikhawhnuah inkharkhip an kalpui ve hnuhnawh a; chu ngawt pawh chuan nunna thahnem tak a chhan him niin mithiamten an ngai a ni. A tawpkhawka khawpui pahniha mitthi zat (fatality rate) chu: Minneapolis lamah 5.2% a nih laiin St. Paul lamah thung chuan 14.7% zet a ni ta a ni.
  • Spanish Flu-in khawvel a tih mangan atanga kum za zen zawn a liam hnuah SARS-CoV-2 hrinchhuah hripui, Coronavirus disease 2019 (COVID 19) tia koh vin kan khawvel a run avanga ram ropui leh chak tam takah mipui an thih zawih zawih laiin ram thenkhatte erawh chu him khatin an him tlat thung a, chung zingah chuan Japan ram hi mite sawi hlawh pawl tak a ni.
  • Japan ramah mipui vantlang zalenna (civil liberty) rahbeh a nih lohna turin, Indopui II-na zawh hnuah khan dan, Post War Constitution an tih mai chu an siam a. Chu dan chuan mimal zalenna tam tak a humhalh sak a, entirnan, sorkarin COVID 19 avangin inkharkhip puang ta se, danin a humhalh avangin khawlaia mipui vak chhuakte chu police hmangin tihluihna a um haw theih an ni lo va, man theih an ni hek lo. Hripui leng kara Japan sorkar innghahna ber pakhat chu ‘mipui vantlang thuawihna’ (Public Obedience Policy) a ni a, Prime Minister Shinzo Abe-a chuan, “Kan mite hi kan hrechiang a, mahni inthununna (self discipline) nei tha hnam kan ni. Mitinin tihphung mumal zui sa kan nei vek a, thuawihna hi kan thisenah a luang tawh a, chuvangin, kan hlauthawng lo,” a ti. Chanvo leh zalenna (rights) hi tihtur leh mawhphurhna (duty/responsibility) nena a kalkawp fuhna apiangah nun a nuam a, nun hona pawh a hlawhtling thin.
  • Japan ramah chuan hmaikawr (mask) vuah an uar sa a, mihring phur lirthei (public transport) a an chuan dawn phei chuan an vuah ngei thin an ti. Vul mawi taka an rama par thin Tlaizawng (Cherry Blossom), an tawnga ‘Sakura’ an tih par ziarang (design) anga chei hmaikawr chu hmeichhe ho vin an vuah nasa a. Mipa tana duante, naupang vuah tura a bik deuh va thuite thlengin duhthlan tur a awm a, hmaikawr (mask) vuah hi an tan thilthar a ni lo.
  • Intawk lo va inchibai chu an tihphung nghet sa a ni a, vantlang hmunah inhnaihchilh luih luih lo va awm pawh an tan a hranpa taka zir thar a tul lo. Tum khat chu tihtur pawimawh avangin Jaipur-ah ka kal a. Hunawlah an khaw chhehvela hmun hluite leh kulh ropui tak takte chu min fanpui hlawm a. Japanese khualzin rualkhat hi an lo thleng ve a, lirthei atangin a mal malin an rawn chhuk diah diah a, fel takin an intlar a, luh hmasak inchuha innek buai an awm lo. (An nulate lah chu an hmeltha si a) ‘ennawm mak tak leh ka lawmna tikimtu’ ti niawm hrimin ka thlir reng mai a ni!
  • Mizote hian vai tihdan tha lo lakchhawn kan ching a, entirnan, thlawhtheihna a tum chiahte hian, thlawhtheihna dang (connecting flight) man lehnghal tur vek niawm fahrana hmanhmawhin kan phu suau va, chhuah hmasak inchuhin thutthleng leh thutthleng inkar zimteah kan innek per dawt dawt fo thin. Programme changkang ve takah vai changkang fu fu, lal ve fu fu, thiamna lamah pawh sang fu fute nen han tiho mah ila, chhunchawlhah ei leh in changho tura kan han intlar hian an hmanhmawh lutuk ta thin a, a bawppui khel zawhsan hlau niawm takin an innek awt awt fo; hengte hi entawn loh tawlh tawlh tur a ni.
  • Inkharkhip lo vin Japan ram hi tun thlengin a la kal thei zel a, chuti chung chuan khawvela ram thiltithei zual pasarih (Group of Seven) ram zingah COVID 19 hri kai tlemna ber leh thihpui tlemna ber ram a ni thei a. April thlaah sorkarin ‘limited state of emergency’ a puang a, a hnu deuhvah rampum huapin fimkhur thuah ‘emergency’ a puang zui ta bawk a. Amaherawhchu, khawsak phung a pangngai a, a hranpa taka inkharkhip a tul lo va, chu chu an nunphung that vang leh an thuawihna rah a ni.
  • Japan ram ai maha entawntlak an la awm leh a, chu chu Taiwan ram a ni. May thla atang khan Taiwan ramah hian COVID 19 hri kai thar hmuhchhuah an awm tawh lo niin an sawi. Taiwan hi India ram aia a let 91 vela te zawk daih a ni a, US-a Maryland State tiat vel khu a niawm e. Hri a len tan tirhah, sakawr thleng hmasa an sawi ang hrima a ngaihna hre lova ram ropui tak takte an hawi at mai mai lai khan Taiwan sorkar tereuhte chuan inralrinna dar a lo khawng ri keuh keuh tawh a, COVID 19 tia a hming phuah anih hma daih khan ‘Severe Special Infectious Pneumonia’ (SSIP) tiin hrileng hming pawh hi an lo phuah diam tawh nghe nghe a ni.
  • Communicable Disease Control Act-in a phut angin, Taiwan Centre for Disease Control hmalaknain Central Epidemic Situation Command Centre an din nghal a, hripui leng dona kawnga hmalakna zawng zawng khaitu a ni. Sorkar hmalakna, damdawi lam hmalakna leh mipui vantlang hmalakna chanchinte pawh an hnenah nitinin a lutkhawm vek a, chungte chu an lo thliar fel a, mipui vantlang hriat tur tulte chu felfai takin an puang darh thin. Kumin January 23 atang khan nitin Press Conference an la nei chhunzawm ta zel a, langtlang tak leh felfai takin thil an kalpui a, mipui tan hriatthiam loh tur leh chiaina tur a awm lo.
  • Taiwan mipuite hian faina leh thianghlimna an ngaisang a, an nunpui bawk a. Vantlang inthiarna te hi a hmang hnuhnung bertu in fai takin an kalsan a, midangte tana hman zui hrehawmin an kalsan ngai lo an ti a. Tripura-ah inthlan kaihhnawih thila kan kal tumin Guest House pakhatah min thlen tir a. A lo luah hmasatu, khatih hunlaia Mizoram sorkara kan Minister leh a thuihruaite sulhnu tawp namen loh zia leh bathroom lek phei chu a kawia a kawi zek zuk dan kha, tunhnuah amah ka hmuh apiangin ka mitthlaah a rawn lang nawn fo thin!
  • Japan ram ang bawkin Taiwan-ah hian hmaikawr (mask) vuah hi an nunphung a ni sa a, damlo leh nuamsam lote phei chuan khawlaia an chhuahin an vuah ngei ngei thin niin an sawi. Hripui a len tan tirh atangin sorkara Minister without Portfolio (Audrey Tang) chu mask supply leh demand lam khawihtu atan an ruat nghal a. Tlawmngai pawlte hmang tangkaiin, thapui thawhin hmaituamna an thui chiam a, mipuiin an inchan kim vek theih nana ruahmanna an siam chu Name-Based Mask Rationing System tih a ni.
  • National Health Insuarance (NHI) Card an neih sa chu hmang tangkaiin, chumi card-a an ID/number chu hmangin online-in an inziak lut (register) a, online-in a man an pe nghal vek bawk a. Hmaituamna chu dawr lian hrang hrangah an sem darh ta a, mipuiin vawilehkhatah dawr an pan huk loh nan, an card number tawp ber chu odd leh even number-in an then leh thlap a; an hun a thlenin chung dawr atangte chuan hmaituamna an lei tawh sa chu an la ta thin a — mi pakhatin karkhatah hmaituamna pakhat zel bak lak an remti lo nghe nghe a ni.
  • A hun taka kan inkharkhip avangin nunna hlu takte chu humin a awm a, nunna siamtu Pathian pawh a lawmin ka ring a ni. Inkharkhip hun a liam mek a, zawi zawiin kan inthlahdul ta hret hret a. Senso tam si lo, nundan mawi leh hrisel, tihphung tha leh zahawm ni bawk, heng — vantlang hmuna inhnaihchilh lohte, hmaituam taimak leh thianghlimna nunpui te hi kan damkhawchhuahna turin a pawimawh zual zel dawn a ni.

Latest News & Chhiar Hlawh