Aizawl: Zirtawp zan khan Mamit-a Mizoram Presbyterian Kohhran Hmeichhe Inkhawmpui lian neihna tur pandal chu mi sual tutih hriat lohten an suasam a, he thil thleng chungchangah hian nimin zing khan Mamit P/S ah FIR thehluh a ni a, he chanchin buatsaih lai thleng hi chuan man an la awm lo a, rinhlelh erawh an nei a ni. Information & Publicity Sub Committee hruaitute hnen atanga thudawn danin, inkhawmpui lian neihna pandal chhung leh pawn lama photo gallery suamsam tute hi mipa 3 nia hriat an ni a, rinhlelh pawh an nei tawh niin an sawi. Heng mi 3 te hi Zirtawp zan rei lam khan pandal-ah hian an kal ni a hriat a ni a, pandal pawn lama photo gallery an siam chu heng mite hian an tihchhiat nual bakah, phai lam atanga an chawkluh bulb man to chite pawh an la vek a. Pandal chhunga an dah zai hruaina khuang pakhat chu a bo a; mahse, pandal chhungah vek an thuh rukna hmuh leh a ni. Heng bakah hian sound system thenkhat lakbo a ni a, pandal satu atana rawih hnam dangte pawh heng mi sualte hian an vau nia hriat a ni bawk. Information & Publicity Sub-Committee hruaitute chuan, pandal chhung atanga thil lakbo hi eng zat chiah nge tih hriat mai theih a nilo tih an sawi a, a theih ang angin an enfel mek zel niin an sawi. Pandal chhung leh pawn a pawikhawihna thleng vang hian inkhawmpui lian neih mekah hian harsatna engmah thleng zui a awm lo a, dan pangaiin inkhawm leh rorel pawh a kal chhunzawm zel a ni.