Aizawl February 21, 2023: Chief Minister Zoramthanga chuan beiseina nena hmalam hun thlir phawt a tul chang a awm thu leh Zohnahthlak te inpumkhatna leh inunauna chu chhawm nun zel pawimawh a tih thu a sawi.

Chin National Day vawi 75-na puala 20.2.2023 zana Vanapa Hall-a programme buatsaih khuallian Chief Minister chuan Chin National Day kum 75 na a thleng chu lawmawm a tih thu a sawi a. Ramchhung buai avanga Myanmar rama Chin unau chengte'n mahni sahimna zawnga an ram an tlansan a ngai chu pawi a tih pui thu sawiin, an lo luh tirh kha covid19 hripui len nasat zual lai nen a in nang chu vanduaithlak a tih chu a sawi. 

Mizoram chhunga cheng ten theihtawp an chhuah thu leh, Myanmar rama remna leh muanna a awm leh ngei a beisei pui thu a sawi bawk. Zoramthanga chuan, "Harsatna te hi Pathian remruat vek a nih avangin tunah chuan hrethiam rihlo mah ila beiseina nen hmalam hun thlir phawt a tul chang a awm. Zohnahthlak te kan inpumkhatna leh inunauna chu chhawm nun zel a pawimawh," a ti.

He hunah hian Chin State Chief Minister hlui, Salai Lian Luai leh Chin State MP hlui, Dr. Naih Tam Maung te hnen atangin thusawi ngaihthlak a ni a, Mizoram sawrkar leh mipuiin raltlante an tuamhlawm dan leh anpuihnaah lawmthu an sawi. CYMA, MZP, MSU, ZORO leh Manipur Kuki Inpui aiawh te thusawi ngaihthlak a ni bawk.