Aizawl March 21, 2023 : Congress media chairman Dr. Lallianchhunga chuan Congress Party chuan mipuite duhsaknain Mizoramah sawrkarna an lo siam tawh thin chu duhthusam ni lo mah se, Mizoram hmasawnna lian tham te chu Congress sawrkar ruahman leh a tih hlawhtlin deuh vek niin a sawi. Lunglei khawpui tana hmasawnna an thlen te sawichhuahna vawiin khan a nei. 

Congress Media chairman chuan, "Mi thenkhatin kan tih loh lai hlir an sawi chuan, kan thil tih tlemazawng tal sawi ve a ngai a ni, tiin High Powered Committee, Lunglei chu District dangten an neih ve miah loh, Lunglei District a hmasawnna hna thawktu Lunglei High Powered Committee chu Congress sawrkar din leh thuam chak tu, inrelbawl thei tura Lunglei mipuite hnena thuneihna petu chu Congress party hi a ni," a ti.

Congress spokesperson chuan an sawrkar lai khan Lunglei By-Pass Road siamna tura hma lak a ni a ti a, cheng nuai 900 dah a nih thu an sawi a, hei hi MNF sawrkar in an chhunzawm duh lo a, ‘Survey-na pawh a daih lo’ tiin hma a la zui duh ta miah lo a. By Pass road siamna tur sum pawh thil dangah a hmang ta daih a ni. Lunglei by pass road siamna tur hi Congress sawrkar lai khan Survey neih vek a ni tawh, a ti a. Mizoram Engineering College, February 3, 2019-a Prime Minister Narendra Modi an a hawn pawh 2019-2020 Academic session atanga tan tura ngaih a nih laiin MNF sorkar hnuaiah tan theih a la ni ta lo a ni, a ti bawk. 

SYS Football Academy, Lunglei thalai, profesional footballer leh midangte hlawhtling takin an lo chhuak tawh chu Congress sawrkar laia din a ni a, Professional huanga lut tawh te Mizorama an rawn haw changa an training-na ber a ni, Congress Party chuan an ti.

Convention Centre leh Thuamluaia Mual, Lunglei te chu Congress sawrkar laia hmalakna vek a ni an ti a, CM hlui Lal Thanhawla hawn a ni nghe nghe an ti a, Lena Stadium pawh Congress sawrkar laia sak tan a nih thu an sawi bawk. Lungleia infiamna hmunhma tam zawk, Thuamluaia mual leh Lena Stadium bakah hian Melte field-te, Chanmari, Electric leh Ramthar venga  Indoor Stadium sak te, Zobawk Sports Complex, AP tlanga Tennis Court-te leh a dang tte chu Congress sorkar laia siam vek, an ti.

Lunglei Water Supply Scheme pawh Congress sorkar laia siam a nih thu leh Greater Lunglei Water Supply Scheme tur pawh Congress sorkar laiin ruahmanna thui tak kalpui a ni an ti a, MZU Southern campus pawh a din theih nan an hunlaiin theihtawp an chhuah an ti

Aizawl - Thenzawl- Lunglei World Bank road, km. 164 a thui hi Congress sawrkar laia ruahmanna siam niin 1998 atanga thawh tan a nih thu an sawi a, 2002 atangin ngawrh taka thawh niin, May 11, 2011 khan Chief Minister Lal Thanhawla chuan a hawng a ni, an ti. 

Thorang bialtu Zodintluanga Ralte, CLP Leader RTPCR pawh MNF sawrkarin an bun duh lo an ti a, Court hian thlen a nih phah an ti a. Thih leh dam inkara Lunglei mipui an awm laia an koh eih phak loh MNF sawrkar chu Lunglei mipuite hian vote nawn hi an ba lo, an ti.

Education Complex & Guest House te, Laldenga Park, Kawmzawl, Pukpui te pawh Congress hunlaia hmalak a nih thu te, hawn hman chiah loh awm mah se, hmala tu an nih thu an sawi . Sawrkar Office Building tam tak Congress sawrkar khan Lungleiah sawrkar building tam tak a sa hman an ti bawk.

Congress Spokesperson chuan, "Congress Party hian a chhe thei ang bera beih a tawk thin a, hmasawnna hna thawk miah lo anga chhuah a ni fo thin. Amaherawhchu, Lunglei mai ni lo, Mizoram a hmasawnna liantham zawng zawng deuhthaw hi Congress sawrkar hnathawh rah a ni deuh vek zawk a ni tih hi mi thil chik mite chuan an hrechiang em em a ni," a ti.

Dr. Maliana chuan, "Lunglei khawpui hian chhantu a mamawh a, duat taka enkawltu tur a mamawh. MNF sawrkar hian Lunglei mipuite hi hmangaihna leh duhsakna tak tak a nei ngai lova. Lunglei Municipal Council ngei pawh hi Lunglei mipui tam takin an duh lo chungin ‘Kan sawrkar laia kan din’ an tih theih nan Lunglei mipuite barhluih an lo ni dawn ta a, inthlan hmachhawn a lo ngai ta a ni. Lungleiin harsatna a tawh laia MLA ngawi reng te ang tho va, Zoramthanga hnena engmah sawi ngam lo tur MNF atangin LMC Councillor tur i thlang lovang u," a ti.

ZPM chu midangte thatna lai hmu duh miah lo riin, "Mi chhiatna lai zawng ngar ngar tute an nih avangin ZNP an nih lai atang tawhin mipuiten an kutah rolrelna an pe duh lo. PHOLENG Youtube Channel in Pu Lalduhoma a kawmnaah khan Officer eirukna pawh a ziaawm ti duh mai a ni a; ZPM CM Candidate hi mipui sum eirukna (corruption) do tak tak ngam lo tur, Officer eiru thin te nena inthurual hreh miah lo tur a ni tih a chian avangin an kutah rorelna pek tlak a ni lo," a ti bawk.