Thangkhat lian aia tam inremna hnuaiah kan lo cheng ta a. He inremna hlutzia hi thangthar ten kan hriat reng a pawimawh tak zet zet a ni. MNF President Pu Laldenga leh India sorkarte chuan kum 10 lai inbiakna an neih hnuin Lalpan Zoram tan Remna leh Muanna a rawn thlentir ta a nih kha. Indian Constitution Article 371 G-na a hranpa meuha ziah belh a lo ni ta a. Kha inremna kha India sorkara hian a pawm thei mai kha khawvel mak tih a ni. Ram leilung humhalhna lam leh Zofate hnam dan tinreng humhalhna lamah te India Parliament meuh pawhin Mizoram Assembly rorelna remtihna tel lo chuan thu a nei lo va. Thil pawimawh ber mai sakhaw thil thlengin a huam lehnghal. MNF hian a din tirh atanga a policy lian ber pawl chu “Kristianna sakhaw humhalh tlat” a ni. Hei hi tlemte a her danglamin “Mizote sakhaw humhalh tlat” inremnaah khan a tel hlauh mai. Mizote sakhua chu Kristianna a ni. Chuvangin, kan hnam lungphum pawimawh ber mai Kristian sakhaw humhalh tlat danpuia an lo khung tel thei hlauh  mai phei hi chua ropui hle a ni. He Mizo hnam neitu Vana kan Pathian hian inremna sawiho lai khan a thiltihtheihna a lantir tih loh rual a ni lo. Heng kan hnam dan leh hrai tinrengte leh sakhuana thlenga inhumhalhna tha tak mai kan nei ta hi humhim tlat kan ba a. Kan inhumhalhnate hi zawi zawia tichhe turin leh fing taka tihdal chu vaiho chuan an tum dawn a. Indian National Party heng Congress tih angho Delhi khuang ben ruala lam zel mai thei angho hi a zawnin term 3 te lo sorkar ta se a pawi thui khawp ang. Vai ho tih dan hrang hrang heng Yoga tih ang velte pawh hi state sorkar thu thu a ni. State sorkarin a duh chuan a hmang lo thei. Kristianna sakhaw humhalhna a tidal dawna kan hriat chuan inremna dan Articles 371 G-na hmangin kan duh lo thei a ni. Heng zawng zawngte kan thlir hian MNF ngei hian sorkarna a siam a, ro a rel a, inremna thu ziakte humhalh tlat duhtu ngei a sorkar chu ram tana tha ber a ni. Hindu Temple-a chal hnawihsen hlur mai thei tawh Chief Minister neih fo hian hnam tan a hlauhawm tak zet zet a. Hnam tana nunna lo dahkham ngam, thi leh thau pawlha ram tana lo beitu lo ni tawh ngei CM-ah kan hlankai a ngai ngawih ngawih a ni. Mipuiin inremna kan duh ngawih nawih tawh avangin MNF te pawh inphah hniam turin kan ngen a. An lo inphah hniam ta a. India sorkar pawh a inphah hniam a, MNF nuai chimih vek a tumna chu a thiat ve bawk a. Chutichuan Mizote tan inhumhalhna leh hnam humhimna tha tak nei inremna chu MNF te a lo sign-pui ta  nai. Hei hi Pathian hnathawh a ni a. Mizote Pathian ngei chuan he hnam hi a hriat rengzia tilangtu a lo ni ta a ni. Inremna champha 1986 June thla a lo thlen hian kan inremna hlutzia kha i hre thar leh ang u. India nena kan indo lai khati chhunga kan hnam tana a man kan pek hi a va tam tawh em! Thihna leh chhiatna rapthlakin kan ram a nuai a, a man a tam lutuk! Chuvangin, Mizoram leh Mizo Hnam hi tithangliana chimral ni lo tura thil pawimawh ber chu MNF a lo sorkar leh hi a ni. Hei hi hnam tinte  leh ram dangte ngaihah pawh thudik tak a ni. Pathian min pek inremna hlutzia hre tharin kan Ram leh Hnam tan i inhlan thar vek ang u.