Mual chhung leh pawn lama player awm tha duh lo, Mario Balotelli chuan a hmaia a tattoo chhut thar tir social media lamah a pho chhuak. Manchester City and Liverpool striker hlui hian a mit vei lam hnuaiah permanent ink-in "MB459" tih a chhut tir a, 2020 khan chi inthliarna a duh loh zia lantir nan a mit dinglam chungah "Black Power" tih tattoo alo chhut tir tawh bawk. 

Kum 31 a upa footballer hian a tattoo te hi Instagram lama amah zuitu mi maktaduai 9 leh nuai 7 zet te hmuh turin a pho lang a ni. Balotelli-a tattoo chhut thar ber "MB459" awmzia tak hi hriat fak a har hle a, Inter Milan lama a khelh lai khan jersey No. 45 a ha thin a, number 45 a thlan chhan fiamthua a sawi dan chuan,"4 leh 5 belh chu 9 a ni" a ti. Number 9 hi striker tam zawkin an ha thin. 

Hmaia tattoo chhut kaiah hian Balotelli hi a mikhual hran lo. Kum 2020 nipui lai khan "Black Power" tih thumal chu a mit dinglam ko-ah a chhuttir a, he a tattoo hi racism do let nana a chhut tir a ni. A mit dinglam hnuaiah hian cross lem a chhuttir bakah a nghawngah gorilla hmai lem a chhu kai bawk. A bek veilamah mupui thla lem a chhut tir a, a nghawngah lian kelh kawlh-in 'M' tih a chhu bawk. Heng bakah hian a awm te, a dar leh a banah te tattoo a nei bawk. 

Balotelli hi tunah Turkish club Adana Demirspor tan khel mekin game 27 khelhah goal 12 thunin assist 6 a nei tawh a, tun hnai a khelh that avangin World Cup play-off North Macedonia nen an khelh dawn tum pawh khan Italian national team-ah koh a ni.