Aizawl: Chief Minister Lal Thanhawla chuan Zohnahthlak hmun hrang hranga awmte insuihkhawmna atan leh phuarkhawmtu atan Duhlian tawng hman tha a tih thu a sawi. Nimin Vanapa hall a Lai Students’ Association (LSA) in zirlai thar lawmluhna programme Fresher’s Social leh zirlai ti tha te chawimawina Felicitation programme an hmanna ah he thu hi sawiin Chief Minister chuan, "Mizoram leilung fate hi India ramah chuan minority kan ni a, nimahsela Zoram chhungah chuan tumah hi minority kan awm lova, tumah mikhual awm lovin, a neitu vek kan ni a, ram siamna kawngah mawhphurhna inchen kan nei theuh a ni tih hi kan hriat a tha a ni," a ti. Chief Minister chuan Mizoram sawrkar in thalai leh zirlai te hmakhua ngaihtuahin thalai te tan khawvel thar a buatsaih mek thu sawiin MYC kaltlangin thalai tam ten Mizoram pawnah hna an hmu a, thalai te tan infiamna ruhrel siam belh mek zel a ni tiin chhawr tangkai turin zirlai leh thalai te a chah bawk.