ZALEN November 27, 2025: Mizorama Indian National Trust for Art and Cultural Heritage (INTACH) chapter pahnihna, Lunglei Chapter chu Mizoram sawrkara Art & Culture Minister C. Lalsawivunga chuan vawiin khan Lunglei Convention Centre-ah a hawng.

INTACH Lunglei Chapter Secretary JC Vanlal Hmuaka chuan report pein, February 2024-a Mizoram Chapter hruaitute'n Lunglei an tlawh laiin Lunglei DC hovin Lungleia INTACH din dan tur sawi hova hma lak tan a nih thu a sawi a. Lunglei Chapter huam chhung Mizoram chhim lama hma lakna tur hmachhawp hrang hrangte a tar lang bawk.

INTACH Lunglei Chapter hawnnaah hian Lunglei West bialtu MLA T. Lalhlimpuia bakah, INTACH Mizoram Chapter hruaitute, Lunglei Chapter hruaitu leh member-te, sawrkar official-te, Government Leitlangpui High School leh Government Electric Veng High School zirlaite an tel a ni. 

C. Luri'n kal khawmte zaia awiin, Mizo Cultural Artists' Association (MCAA) Sub-Headquarters Lunglei te'n solakia lam an entir a. INTACH Lunglei Chapter Executive Committee Member C. Lalhmingmuana'n lawm thu sawiin hun a khar.

INTACH hi kum 1984 khan din niin, Delhi-ah hmunpui an neih bakah, India ram hmun hrang hrangah chapter 200 chuang an awm mek a. Tuna Chapter hawn thar Lunglei Chapter-ah hian member 40 awm mekin, he'ng hi hruaitute an ni:

Convener : Rev. Dr. F. Sangvela

Co-Convener : K. Lalsanga

Secretary : JC Vanlal Hmuaka

Treasurer : ZH Ropuia