Greco-Roman style-ah Kolasib an che tha a, Ningani zan hun an hman zawh rualin Inter District Wrestling Championship-ah Aizawl leh Serchhip lehpelin a sang ber.

Mizo palian inchai champion lai cho thei tur a chiang hnai tawh a; Lalremtluanga’n Laldinthara chungnung takin a hneh a, a hmawrbawknaah Lalrinchhana Sailo nen title fight-a tel tur zawk nih an inchuh dawn.

LPS Arena, Falkland-ah Mizoram district 11 zinga pasarih an inel a, ni hmasa berah sub junior atangin Kolasib-in gold medal panga lain hma an hruai a; mahse, Ninganiah pakhatna nihna an neih belh lo avangin pathumnaah an tla hniam.

Ni hnihnaah senior huanga greco-roman style inelna chi thum zawh fel a ni a, Kolsib-in gold pahnih an lak mai bakah kg 58-ah dawhsan luah fai vekin John Lalremmawia a chak ber a, Lalhumhima’n silver lain David Lalruatpuia’n bronze a dawng.

Kg 40 final-ah Kolasib ve ve inchai bawkin Isak Lalmalsawma’n Jonathan Vanlalngaihsaka a hneh a; junior freestyle kg 58 final-ah Lalnuntluangi’n Lalduhzuali (Serchhip) hnehin gold medal a la bawk.

Kolasib-in gold paruk nen medal 13 dawng tawhin hma an hruai a; Aizawl tan junior freestyle kg 50-ah Esther Lalchhanchhuahi leh kg 70-ah Lalnunsanga an champion ve thung a, gold panga nen medal 24 la tawhin pahnihnaah an awm.

Serchhipin gold panga la ve tho mah se silver pahnih an kawl a. Ni hnuhnung ber, Zirtawpniah an chet that chuan a pum puia sang ber nih theihna hun tha erawh an la nei.

Senior greco-roman style kg 65-ah Lalchhanhima a champion a, Saitualin gold medal an lak hmasak ber leh awm chhun a ni rih a. Senior freestyle kg 50-ah Elizabeth Kawngkharmawii’n Lunglei tan gold medal hmasa ber a thawk chhuak bawk.

Zanah Mizo inchai title chuh tur zawnna semifinal zawh a ni ve thung a. Palian pathum tel zingah Zobawk, Lunglei inchai chak, Remtluanga’n harsa lo takin Nilaini zana Rinchhana’n a bawhbeh tawh Zokhawthar tlangval, Dinthara a hneh.

Thawh khatnaah Remtluanga’n a bawhbet a, a hnuah 14-0-a sang zawk a nih laiin dar hliam vangin thawh hnihna khel tluan lovin Dinthara a inhnukdawk a ni.

Palaihawlah Serchhip pa chak, RD Lalthansanga’n thawh thum an inbeih chhungin 32-0-in John Zonunsanga (Ailawng) a hneh a. Final-ah Saitual tlangval, Ngursangzuala nen an intawng ang.

Ngura hian 4-0-in Vanlallawma (Muallungthu) a hneh ve thung a, thawh thum an inbeih chhungin a duh angin bawhbet thei lo mah se a nawr chhuah thin bakah danglamna thlen thei khawpin point a thawk chhuak.

Inter district inelnaa Saitual gold medal neih chhun latu, Lalchhanhima’n Patê title lak kir a tumna a puitlin zo lo teuh hle a, semifinal-ah inhnial theih takin a chak.

Republic Veng tlangval, Hmangaihzuala nen point khat mah hmu lo ve vein thawh thum an hmang zo va. Inbanphawi hmangin a chak an zawng a, a vawi khatnaah tuantga leh an inchai chhunga lehlam thunun hnem zawk Hmangaiha a chak emaw tih hnuah referee leh judge thutlukna a inan loh avangin an titha leh.

A tum hnihnaah pawh chak zawk a chiang lo viau na a, Saitual pa chak, Chhanhima lamah referee-in ban a phar a ni.

Semifinal lehlamah 2011-2014 chhunga champion, Lalawmpuia’n Johny Lalawmpuia (Saitual) a hneh hram a. A bet zawkah tang hnem mah se point a hloh lo va, rin bial pawnah vawi khat a keuh chhuah chhawrin, 1-0-in Bulfekzawl chhuanvawr a tlang.

Zirtawpni chawhnu dar 1-ah chhunzawmin Inter District Championship bik zawh fel a ni ang a. Zan dar 8 aṭangin Mizo inchai palian, palaihawl, patê, nulian leh nutê champion lai cho tur zawnna final a ni ve thung ang.