Inter District Wrestling Championship vawi sarihna ni hmasa berah sub-junior inelna zawh fel a ni a, gold panga nen medal pakua lain Serchhip an sang ber.

Inelna dang ngaihven hlawhah Mizo palian inchai champion Lalsangliana cho tur zawn a ni a. Mi pali tel tura beisei an nih laiin pathum ziah luh an ni a, North Vanlaiphai inchai chak, Lalrinchhana Sailo chuan Zokhawthar tlangval, Laldinthara a bawhbet.

Nilaini chhunah LPS Arena, Falkland-ah hawn a ni a, zanah chhunzawmin kum 15 hnuai lam inelna zovin gold medal 10 an sem chhuak a. District pasarih telin Serchhipin gold awm chanve panga bakah silver leh bronze pahnih ve ve an la.

Kolasib-in dawtin gold pathum leh bronze pakhat an dawng a; pathumnaah inelna thlengtu, Aizawl an awm a, medal 15 dawng mah se gold pahnih chauh telin silver pasarih leh bronze paruk an hlawh chhuak.

Zanah Mizo inchai title chuh tur zawnna buatsaih tanin thawh thum zel an inbei a. Palian inchai hmasa berah thawh hnihna a tawp thlengin point a awm lo va, thawh hnung berah Rinchhana’n vawi 10 chhiar thlengin Dinthara a bawhbet a, chiang takin a chak.

A vawi khat nana title chuh thei turin Rinchhana’n hmabak a nei tam tawh lo va. Lunglei tlangval, Lalremtluanga nen an innuai leh dawn a, a chak a nih chuan a tlang ang a. Kum 33 mi, Sangliana hmaa ding tur zawnnaa tel palian pathum an inchai kual vek dawn a ni.

Palaihawl title chuh tumin mi panga an tel ve thung a, Saitual inchai chak, Ngursangzuala’n harsa lo takin Ramropuia (Mamit) a hneh a, 10-1-in a hneh.

Semifinal-ah Ngura’n Vanlallawma (Muallungthu) a hmachhawn dawn a, lehlamah RB Lalthansanga (Muallungthu) leh Jeho Zonunsanga Ralte (Ailawng) an inchai ang.

Patê title chuh tumin mi pariat an tel ve thung a; eng emaw chen title kawl tawh, Lalchhanhima’n mi thar, Nazareth Lalthazuala lakah inlehthalna a pumpelh hram a, 4-3-in a chak.

Saitual chhuanvawr, Chhanhima hian thawh khatnaah thiamna a neih chhawrin point li a hmu nghal a. Combat sports hrang hrang khel kual nasa tak, Zemabawk tlangvalin nawr letin thahrui a nei a, thawh thumna thlengin a fei a; mahse, tawnhriat a tlachham a, point thum bak a hmu ve hman ta lo.

Republic Veng inchai chak, Lalhmangaihzuala’n 6-4-in amah aia tawnhriat nei, Lalhruaitluanga (Kolasib) a hneh ve thung a; a tir lamah hniam zawk mah se thahrui nei leh chau har zawk a nihna chhawrin a tuan a tha zawk bawk a. Semifinal-ah Chhanhima nen an inhmachhawn ang.

Champion tawh, Bulfekzawl inchai chak, Lalawmpuia’n title lak kir a tumna a puitling zo lo nghal teuh hle a, Jacob Lalrinliana (Venghlui) nen thawh thum an inchai zawh thlengin 4-4-in an inhnehtawk a. Inbanphawi hmangin chak zawk an zawng a, a tlang hram.

Saitual tlangval, Johny Lallawmkima’n harsatna lian tawk lovin John Lalremmawia (Kolasib) a hneh ve thung a, 6-0-in a chak a. Semifinal-ah amah aia hnuhma nei tha, Awmpuia a hmachhawn a tul dawn a ni.

Ningani chaw hma dar 11 atangin inter district junior leh senior inelna neih a ni ve leh ang a, zan dar 8-ah thawh hnihna chhunzawmin Mizo inchai title chuh tur zawnna a awm leh dawn a; inchai hi LPS 10 leh LPS youtube channel-ah live-a pek chhuah a ni.