Mizoram Basketball Association (MBBA) buatsaih, kum 14 hnuai lam mipate tana veng leh veng inelna chu Thawhtanni zan hian tan a ni dawn.

A sponsortu lian ber, Ather MST Motors hmingchawia Ather MST Motors Inter Veng Under-14 Basketball Tournament 2023-ah hian veng 11 atangin rawlthar rual an inlan dawn a, Hawla Indoor, Republic Vengthlangah zanah zel khelh a ni ang.

A tan zanah hian veng paruk inlanin inkhel pathum a awm dawn a. Final zan tih lovah chuan zan tin inkhel pahnih a awm zui zel ang.

A tan zanah hian dar 6:00-ah Venghlui leh Upper Republic rawlthar rualten inelna bul tanin Tuikual South leh Ramhlun North-in an zui ang a, Khatla South leh Bungkawn an inhmachhawn leh bawk ang.

MBBA-in kum 14 hnuai lamte tana veng leh veng inelnaa buatsaih hmasak ber hi Thawhlehni leh Nilaini zanah quarterfinal khelh inkhel pahnih ve ve aawm ang a. Ningani zana semifinal inkhel pahnih awmin Zirtawpni zanah final khelh a ni ang.

Mizoram hi kum 14 hnuai lam mipaah chuan India ram pumah basketball thiam ber a ni mek a. August thlaa Basketball Federation of India (BFI)-in Puducherry-a 48th Sub Junior National Basketball Championship a buatsaihah khan champion lehin a zawnin ram pum huapa rawlthar basketball thiam ber nihna hauh mektu a ni.