ZALEN, Nov. 29, 2024: Mizoram Football Association (MFA) buatsaih, GIG Motors MFA ALL Mizoram Inter Village Football Championship 2024 khelh mekah veng/khua 88 inlan atangin 16 chiah an dam ta a, an zingah Aizawl khawpui pawn pali chiah an awm tawh.

Rs. Nuai 2 leh sial inchuhnaah hian round of 32-ah khan Aizawl khawpui pawn 12 lai an la tel a, pariat tlain tunah chuan Melbuk, Kolasib Joint, Sihphir Venghlun leh Lengpui VC-te chiah an dam tawh a ni.

Mizoram khawchhak lam khaw lian lo tak, Melbuk hian Thawhtanni khan 1st MAP Ground-ah 11-0 zetin Phunchawng LC an sawp a; Lallawmsanga’n goal ruk zet thunin Lalbiakmuana’n goal nga a thun bawk.

Kolasib Jt. VC hian Thawhlehni khan Rajiv Gandhi (RG) Stadium, Mualpuiah si nga faiin Mission Veng LC chu an sawp a. Aizawl daia Sihphir Venghlun hian Ningani khan 1st Bn. Ground, Armed Vengah Tuithiang LC chu si thum faiin an hneh.

Lengpui VC hian Zirtawpni khan 1st Bn. Ground-ah Tuivamit chu si riat faiin an sawp bawk a. An player pathum - Lalrokima, Hmingchungnunga, leh Vanlalthafamkima ten goal hnih theuh an thun.

A thiam veng/khaw 16-te hi quarterfinal luh inchuhin Thawhtanni leh Thawhlehni hian an inkhel leh dawn a. RG Stadium leh 1st Bn. MAP Ground-ah ni khatah inkhel pahnih ve ve zel a awm ang.

November 12 atanga khelh tan, GIG Motors MFA All Mizoram Inter Village Football Tournament 2024-ah hian Aizawl khawpui chhung atangin local council team 48 an inlan a. Village council team 33 leh village council pakhat aia tam team khata intel khawma chhuak pasarih an awm bawk.

A vaiin khua/veng 88 tel turin an inziak lut a, champion team-in Rs. nuai 2 leh sial an dawng dawn a, final hi December 12, 2024 zanah RG Stadium-a khelh tura ruahman a ni.

MFA-in veng/khua a buatsaih football inelna a buatsaih hnuhnung ber chu kum 2022 kha niin Aizawl khawpui pawn pahnihin final khelin Champhai Kanan VC-in Sialhawk an hneh.

Hemi tum hian team 204 zet telin mipui pawhin an hlut hle a. He tournament-a che thate hi kumin inelnaa seeding siamah chanvo tha chantir zui an ni nghe nghe.

FIXTURE:

December 2, 2024 (Thawhtanni)

11:00 AM Kolasih Jt. VC vs Republic LC (RG Stadium)

01:30 PM Bethlehem Vengthlang LC vs Salem Veng LC (RG Stadium)

11:00 AM Durtlang LC vs Melbuk VC (1st Bn MAP Ground)

01:30 PM Armed Veng LC vs College Veng LC (1st Bn MAP Ground)

December 3, 2024 (Thawhlehni):

11:00 AM Ramhlun North LC vs Chanmari West LC (RG Stadium)

01:30 PM Bawngkawn LC vs Zemabawk North LC (RG Stadium)

11:00 AM Sihphir Venghlun VC vs Tlangnuam LC (1st Bn MAP Ground)

01:30 PM Lengpui VC vs Chhinga Veng LC (1st Bn MAP Ground)