ZALEN, Nov. 9, 2024: Thawhlehni atanga khelh tan tur, GIG Motors MFA Inter Village Football Tournament 2024-ah team 88 a tel dawn a. Champion team-in Rs. nuai 2 leh sial an dawng dawn.

Inrinni zan hian Dawrpui Multipurpose Centre, Aizawlah kick-off a ni dawn a, hetah hian Mary Dawngi a zai ang.

Tun tum tournament-ah hian Aizawl khawpui chhung atangin local council team 48 an inlan dawn a. Village council team 33 leh village council pakhat aia tam team khata chhuak pasarih an awm dawn bawk.

Tournament hi Aizawla khelmual pathum, Rajiv Gandhi Stadium, 1st Bn. MAP Ground leh Chite Veng Playground-ah te khelh a ni ang.

MFA-in veng/khua a buatsaih football inelna a buatsaih hnuhnung ber chu kum 2022 kha niin Aizawl khawpui pawn pahnihin final khelin Champhai Kanan VC-in Sialhawk an hneh.

Hemi tum hian team 204 zet telin mipui pawhin an hlut hle a. He tournament-a che thate hi kumin inelnaa seeding siamah chanvo tha an chang zui dawn nghe nghe a ni.