ZALEN, Nov. 22, 2024: Mizoram Football Association (MFA) buatsaih, GIG Motors MFA ALL Mizoram Inter Village Football Championship 2024 khelh mekah veng/khua 32 chiah an dam ta a, Aizawl khawpui pawn 12 chiah an tel tawh bawk a, Thawhtanni atangin round of 16 luh inchuhin an inkhel tan ang.

Round of 32 hi khelmual pahnih, Rajiv Gandhi Stadium leh 1st Bn. MAP Ground-ah khelh tur a ni a, Zirtawpni thleng khelh a ni ang.

A thiam veng/khua 32 zingah hian Aizawl pawn atangin Hriphaw, Thenzawl Jt., Kolasib Jt., Vairengte Jt., Melbuk, Lungdai, Farkawn, Sihphir Venghlun, Tlangmawi, Lengpui leh Mamit Jt. Village Council te an la tel.

November 12 atanga khelh tan, GIG Motors MFA All Mizoram Inter Village Football Tournament 2024-ah hian Aizawl khawpui chhung atangin local council team 48 an inlan a. Village council team 33 leh village council pakhat aia tam team khata chhuak pasarih an awm a ni.

A vaiin khua/veng 88 tel turin an inziak lut a, champion team-in Rs. nuai 2 leh sial an dawng dawn a, final hi December 12, 2024 zanah RG Stadium-a khelh tura ruahman a ni.

MFA-in veng/khua a buatsaih football inelna a buatsaih hnuhnung ber chu kum 2022 kha niin Aizawl khawpui pawn pahnihin final khelin Champhai Kanan VC-in Sialhawk an hneh.

Hemi tum hian team 204 zet telin mipui pawhin an hlut hle a. He tournament-a che thate hi kumin inelnaa seeding siamah chanvo tha chantir zui an ni nghe nghe.