ZALEN, October 07, 2025: Mizoram Volleyball Association (MVA) buatsaih, GIG Motors Inter Village Volleyball Tournament khelh mekah veng/khaw thiam pariat ve ve chauh an awm ta a. Mipaah champion lai, Khawhai Village Council chuan lut hmasa berin hnuhma nei tha, Muanna Veng leh Hunthar Local Council-ten an zui a. Nilaini hian quarterfinal khelh a ni ang.

R.Dengthuama Hall, Mualpui, Aizawla October 1, 2025 atanga inelna tanah hian mipa team 68 leh hmeichhiaah team 12 inlanin hmeichhia leh mipa inlan kawp thei veng/khua paruk an awm a, heng zingah hian ITI Veng LC team hnihin quarterfinal an lut thei.

Thawhlehnia mipa inkhelah champion lai leh Mizorama volleyball league sang ber, Pro Volleyball League-a Tuichangral Volleyball Club innghahna, Khawhai chuan North Vanlaiphai VC II chu 3-0 (25-18, 25-15, 25-21)-a hnehin a thiam pariat zinga tel hmasa ber an ni.

Khawhai hmachhawn tur hian Khuangleng VC chuan set hmasa ber laa a dawt set hnih an hloh hnuah NE Khawdungsei chu 3-2 (25-17, 23-25, 21-25, 25-21, 15-8)-a lehthalin quarterfinal an inhlangkai bawk.

Pro Volleyball League-a hmeichhe team nei, ITI Veng chuan set an inlak chhawk zak zak hnuah Pamchung chu 3-2 (25-18, 23-25, 25-13, 26-28, 15-4)-in an hneh a. Mizo spiker tha, Fabian Lallunghnema telna, Chhinga Vengin 3-1 (25-22, 25-23, 23-25, 25-14)-a Saitual VC I hnehin quarterfinal-ah an inhmachhawn zui ang.

Player hriat hlawh, Laldensanga telna, volleyball veng anga hriat hlawh phak, Nursery Veng chuan Aizawl pawn lam team beiseiawm ber pawl leh Pro Volleyball League club nei khua, Khawbel chu 3-2 (25-23, 24-26, 25-20, 21-25, 15-10)-a hnehin quarterfinal an lut.

Nursery Veng hian semifinal luh inchuhnaah YMA volleyball champion lai leh Pro Volleyball League player tamna, Muanna Veng an hmachhawn zui dawn a. Mizoram volleyball hmunpuia chhal ngam zinga mi, Muanna Veng hian Lungdai chu 3-2 (25-22, 25-27, 22-25, 25-19, 15-9)-a hnehin a thiam pariatah an tel.

Ngopa-in Suangpuilawn chu 3-0 (26-24, 25-18, 25-16)-a hnehin harsa vak lovin quarterfinal an lut a. Semifinal-ah inelna hnuhnung bera finalist leh sulhnu nei tha, Hunthar an hmachhawn dawn.

Mizoram volleyball hmunpui zinga mi leh champion tura rinkai zinga mi, Hunthar hian a thiam pariat zinga tel turin Bungtlang chu 3-1 (27-25, 25-20, 23-25, 25-20)-in an hneh ve bawk a ni.

Hmeichhiaah YMA volleyball champion lai, Pro Volleyball League club pawh nei veng, Bungkawn chuan an thenawm hnai lawka mi, Lawipu chu 3-0 (25-8, 25-12, 25-15)-a hnehin harsa lo takin quarterfinal an lut a. Zokhawtharin Pro Volleyball League club nei veng, Luangmual chu 3-0 (25-17, 25-7, 25-12) bawka hnehin a thiam pariat zingah an tel bawk.

Quarterfinal inkhel hi Nilaini chhun dar 12:00 atangin tan a ni dawn a, court pahnihah hmeichhia khel hmasain mipain a zui dawn a ni.

October 8, 2025 - Quarterfinal

Court No. 1 (12:00 noon)

1) Thenzawl South VC I vs Electric Veng LC (Hmeichhia)

2) I.T.I Veng LC vs Thingdawl VC I (Hmeichhia)

3) Khawhai VC vs Khuangleng VC

4) Chhinga Veng LC vs I.T.I Veng LC

Court No. 2 (12:00 noon)

1) Dawrpui Vengthar LC vs Lungdai VC (Hmeichhia)

2) Bungkawn LC vs Zokhawthar VC (Hmeichhia) 

3) Muanna Veng LC vs Nursery Veng LC 

4) Ngopa VC vs Hunthar LC