Mizoram Volleyball Association (MVA) chuan thla tharah Inter Village Volleyball Tournament a buatsaih dawn a, tunlai boruak avangin team tam zawk an tel theih ngei an beisei.

R Dengthuama Indoor Stadium, Mualpuiah September 19 atanga 29 chhungin neih a ni dawn a. MVA General Secretary C Lalrokhuma chuan a boruak atangin tel an tam dawn tih a sawi.

“Veng leh khaw hrang hrang inelna tur a nih angin All Mizoram Village Council Association leh Aizawl City Local Council Association remtihpuina leh hriatpuina thlap a buatsaih tur a ni a. Kum dang zawng aiin team tel an tha hnem ngei ang tih a beiseiawm a, Local Council leh Village Council tin tel turin kan sawm nghal a ni,” a ti.

MVA-in kum hnihna zelah Inter Village Tournament a buatsaih thin a, Covid-19 leng avangin 2021-ah a huaihawt thei lo. A hnuhnung ber, kum 2019 khan mipa team 52 telin Maubawkin final-ah 3-1-in Hunthar an hneh a, hmeichhe team 18 tel zingah Kolasib Diakkawn an champion a, final-ah 3-0-in Thenzawl East an hneh.

Puitea chuan, “Tun kum hnih thum chhungin Mizoramah volleyball boruak a lian tharin khel an tam zual hle a. Nikum leh kumin boruak aṭangin team tel an tam viau dawn tih a hriat theih,” a ti.

Veng leh khaw hrang hrang inelna Central YMA volleyball tournament hnuhnung ber nikumah mipa team 104 leh hmeichhia team 39 an tel a, mipa lamah Hunthar champion-in Bungkawn hmeichhe team an champion bawk.

MVA chuan kum tina veng leh khaw inelna a awm theih nan Central YMA volleyball tournament a awm loh kumah inter village tournament an huaihawt thin a. Mizoram inelna sang ber Pro Volleyball-a an thawhpui LPS Vision chuan live-in inkhel a pe chhuak ang.