ZALEN, October 08, 2025: GIG Motors Inter Village Volleyball Tournament 2025-ah ni hnih chiah hmabak a awm ta a, Ningani hian hmeichhia leh mipa semifinal khelh a ni dawn.

October 1 atanga R. Dengthuama Hall, Mualpui, Aizawla inelna neihah hian Nilaini khan quarterfinal pariat khelh a ni a. Mipaah YMA volleyball champion lai, Muanna Veng Local Council an tla.

Mizoram volleyball hmunpui pakhat, Mizorama volleyball league sang ber, Pro Volleyball League player pawh thahnem tak kawltu, Muanna Veng hi Nursery Veng lakah set 2-1-a hma an hruai hnuah 3-2 (18-25, 25-17, 25-20, 20-25, 12-15)-in an tlawm.

Nursery Veng hian semifinal-ah Muanna Veng ai maha veng huap inelnaa sulhnu nei tha, inelna hnuhnung bera finalist, Hunthar an hmachhawn dawn.

Hunthar hian Pro Volleyball League club an nei a, player tha tak an nei bawk a, Ngopa chu harsa lo takin 3-0 (25- 21, 25-15, 25-22)-a hnehin semifinal an lut.

Champion lai, Khawhai chuan an nomawi kawl lai humhim turin kawng harsa an la zawh lo tluang zel a, quarterfinal-a Aizawl pawn team pahnih zinga pakhat, Khuangleng chu 3-1 (25-20, 25-16, 20-25, 25-20)-in an hneh a, a thiam pali zingah an tel.

Khawhai hian final luh inchuhnaah tun tum inelnaa hmeichhia leh mipa team nei kawp veng/khua paruk zinga pakhat, ITI Veng an hmachhawn dawn a. Anni hian team tha leh Pro Volleyball League club, Chhinga Veng Spikers innghahna, Chhinga Veng chu harsa lutuk lovin 3-0 (25-16, 27-25, 25-18)-in an hneh ve thung.

Hmeichhiaah Thenzawl South-in 3-0 (25-6, 25-12, 25-5)-a Electric Veng hnehin semifinal an lut hmasa ber a, final luh inchuhnaah Thingdawl an hmachhawn ang. Anni hian Pro Volleyball League club nei veng, ITI Veng nulate chu 3-1 (25-23, 27-25, 15-25, 25-21)-in an hneh.

Hmeichhe volleyball-a tun hma atanga team tha ni reng thin, Dawrpui Vengthar chuan Lungdai lakah 3-0 (25-8, 25-12, 25-5)-a harsa lo taka hnehna changin a thiam pali zingah an inhlang kai a. Semifinal-ah YMA volleyball champion lai, Bungkawn nen an inhmachhawn zui ang.

Pro Volleyball League club nei veng leh player pawl kawl nual, Bungkawn hian Zokhawthar chu semifinal luh inchuhnaah 3-0 (25-19, 25-21, 25-17)-in an hneh ve thung a ni.

Mizoram Volleyball Association (MVA) buatsaih inelna semifinal hi Ningani chawhnu dar 02:00 atangin a hmun ngaiah khelh a ni dawn a, hmeichhiain khel hmasain mipa inkhelin a zui dawn a ni.

October 9, 2025 Semi Final (02:00 PM) 

Thenzawl ‘S’ VC vs Thingdawl VC I (Hmeichhia)

Dawrpui Vengthar LC vs Bungkawn LC (Hmeichhia)

Khawhai VC vs ITI LC (Mipa)

Nursery LC vs Hunthar LC (Mipa)