International Film Festival, Inox Panaji, Goa-a neih mekah Mizo pa kutchhuak Cheraw documentary film chu Documentary Film (Non-Feature) huangah film sangkhat chuang zet atanga telh tur bik a tha zual 20 thlanchhuah zingah a tel. 

He film festival hi November 20 khan tan a ni a, Union Information and Broadcasting Minister Anurag Singh Thakur-a'n Thawhtanni khan a hawng a ni - November 28 thleng a awh ang. Documentary Film (Non-Feature) huanga film tha zual 20 thlan chhuah zingah 'Mau : The Spirit Dreams of Cheraw' tih chu thlan zingah a tel a, November 22, Nilaini khan IFFI Goa-ah chhuah a ni. 

He documentary film tawi hi Cheraw lam lo chhuah dan chungchang leh he lam lo chhuahna bul - nu raicheha thiin a thlarau zinkawng harsa tak a zawh dan tarlanna chungchang a ni. Mizo te nuna Mau pawimawh zia leh a tel lova hnam ziarang (culture) a bo theih thu tarlanna a ni tel bawk. 

He documentary film hi PC. Lalrindika, M. Phil dissertation (Dept.of History & Ethnography, MZU) research behchhana Brahmaputra Cultural Foundation-a Director Shilpika Bordoloi te buatsaih a ni. A film-ah hian YMA Saitual Bazar Branch Cultural Troupe ten mawi takin cheraw lam an entir a ni. 

He film hi Lalramlawi'n Mizo tawngin a sawi (Narration) a, English subtitle pek a ni bawk. Mizo lam hmingthang cheraw chungchang leh mizo kutchhuak lanna film International Film Festival-a thlengphak kan neih hmasak ber a ni. 

Enge International Film Festival chu?

International Film Festival hi Januanry 24, 1952 atang khan Mumbai-ah neih tan a ni. India Prime Minister hmasa ber Pt Jawaharlal Nehru kaihhruaina hnuaiah Film Division, Govt of India bultumin neih tan a ni a, Asia khawmualpuia Film festival lian ber pakhat a ni. 

Kumtin November thla emaw December thla emawah khel lova neih thin a ni. Festival-ah hian khawvel hmun hrang hrang atanga Film leh Documentary film thazual thlan chhuah bik te film critics ropui tak takte endikna hnuaiah chhuah a ni thin. Cinema kal tlanga culture leh nunphung tha zawk inzir tawn nan te, khawvel hnam hrang hrang inthianthatna leh inunauna kawnga hmasawn nan te, rilru themthiam (creative mind) neihna tur leh thawhhona tha zawk neih theih nan te a hmalak hi Film Festival in a tum a ni. 

Kum 2004 atang khan Goa-ah Festival hi thlen thin a ni ta a. Kumin Festival pawh hi National Film Development Corporation of India (Ministry of Information and Broadcasting hnuai ami) leh Govt. of Goa te tangkawpin an buatsaih a ni. 

IFFI-a tel tur hian film siam lama tui ten hun tiam chhungin an film siam an submit thin a. Film (feature & non feature) sang tam tak zingah film 20 (non feature) bikah thlan chhuah a ni a, heng zingah hian Mau: The Spirit Dreams of Cheraw pawh hi thlan chhuah ve niin, he film hi Mizoramah pawh chhuah ve thuai tura hmalak mek a ni.