Aizawl June 14, 2024 : Thailand-a Chiang Mai leh Mai Sot-a International Media Stakeholder Meeting neihah India aiawhin Journalist Kimi Colney, Mizoram Journalist Association member chu a tel a, he hunah hian presentation pe-in Mizoram-a raltlante YMA leh Khawtlangin an lo dawnsawn dan kalkhawmte hmaah hian a sawi.

He hunah hian Mizoram, Manipur, Thailand leh Myanmar aiawh te an tel a. He inhmuhkhawm hi kar hnih chhûng neih a ni a, state leh ram ai an awhnaa raltlan te dinhmun hriatchianna tur leh heng raltlante chungchanga tha zawka thuthar thehdarh dan te an zirho a ni.

Thuthar lakhawmtu hmeichhia kal te hian raltlante chungchanga zirchian ngai bakah ril zawka raltlante dinhmun hriat theih dan tur te an zirho a. Mizoram aiawha kal Kimi Colney chuan Mizoram a raltlante dinhmun a sawi.

Kimi Colney hian Mizorama raltlante lo dawnsawn kawnga Young Mizo Association leh Mizo khawtlangin tha an thawh nasat zia a sawi a. Khawvel huap NGO te puihna dawn a nih chuan tun aia nasaa raltlante dinhmun pawh a that a rin thu leh, an harsatna pawh nasa zawka sutkian sak an nih tur thu a sawi a ni. Kimi Colney chuan raltlanten Mizoram chhunga raltlan camp hrang hranga harsatna an tawh te a tarlang bawk a, Mizoram-in theihtawp chhuah mah se, sum leh pai leh hmanraw ngaihtuah thuah tlin loh chin erawh an neih thu a sawi bawk.

June 3 atang June 12 khan Thailand journalist 2 leh India journalist 2 te chuan Thailand a khaw 2 - Chiang Mai leh Mae Sot-ah Myanmar NGO leh politics lama hmeichhe hruaitu leh raltlan tana hma la tute bakah Thailand-a Myanmar raltlante an hmu a inkawmhona an neihpui a ni. Thailand, India leh Myanmar media te nena inhmelhriat tawnna bakah harsatna te in hrilh tawna hma lak ho theih dan tur te an sawiho a ni.