Miss Mizoram 2020 Zirsangpuii chuan modeling agency WING management-ah contract a ziak ta rup mai. WING management hian Delhi-ah hmunpui an nei a, international modeling agency an ni. He agency hnuiah hian Mizo tlangval Lalrinzuala chu a lo inziak lut tawh a, Sangpuii hian a zawm ve dawn a ni, Mizo mipa pakhat pawh lut leh mai tur a awm cheu bawk. 

Khawzawl nula Sangpuii hian kum khat chhung atan contract a ziak a, a tul dan a zira pawh sei zel theih a ni. WING management agency hnuaia model inziak lutte hi a tam zawk chu Brazil leh Venezuela mite an ni a, India mi pawh an awm nual. Ram pawn thlenga placement an zawn sak thin avangin model ten an bawh nasa hle a ni. 

Sangpuii hian June thla khan sawmna hi a dawng a, mahse a tirah a chhang nghal mai lo. Tunah erawh contract a ziak fel tawh a, kum khat chhung chu Delhi tlangah a hun tam zawk a hmang rih dawn a ni. WING Management hi June 2019-a din kha niin, modeling agency thang duang tak an ni.