Internet khawvel-a cheng kan nih tawh avangin, kan hmuh duh en chak zawng chu internet atangin kan hmet chhuak zung zung mai tawh thin. Tun hnaiah Betting sites chuan infiammi zinga internet lama mi zawn nasat ber chu, Manchester United star Cristiano Ronaldo a nih mek thu an sawi. 

Ronaldo leh Lionel Messi te pahnih hi hnial rual lovin, he planet-a footballer lar ber pahnih an ni mek a. Ronaldo hian Instagram lamah follower 459 million nei mekin football player zinga official taka billionaire a puan awmchhun a la ni bawk. Forbes tarlan danin, Portuguese superstar hian a career-ah $1,250 million bawr vel a lalut tawh a ni. 

Infiammi zingah CR7 hi internet lama hming zawn nasa ber a ni a, Ronaldo hming hi thla tin internet lam atanga zawngtu mi maktaduai 11 an awm a, zawn hlawh ber a ni mek.  

List-ah hian NFL player Ryan Ramczyk chuan pahnihna hauhin Brazilian winger Neymar chuan pathumna a hauh thung. Ramczyk-a hming zawngtu hi mi maktaduai 6.1 niin Neymar hi mi million 5.8 zetin thla tin an zawng thin. Ronaldo chu an phak rihlo vai vai khawp mai. 

Basketball star LeBron James chu pali-na niin mi maktaduai 5.3 in thla tin an zawng thin a, PSG star Lionel Messi a hming hi internet lama zawngtu chawhrual chu mi maktaduai 4.8 niin pangana a hauh thung. 

Manchester United-in UCL an khelh phak loh vangin leh player thar a duh ang an lak luh loh vangin Cristiano Ronaldo hian club a chhuahsan maithei tih thawm te a ri a, hei vang hian tun hnai chu a chanchin hian ngaihven a hlawh zual pawh a ni maithei. Amah ngau ngau bakah kum 37 mi hian, kawppui chhelo tak Georgina Rodriguez leh amah chhun a inkhelh thiam tak fapa Ronaldo Jr. te neih vangin miin an ngaihven phah ve deuh bawk niin a lang.