November 6, 2023; Mizoram Election Department chuan Election duty laia vanduaina tawk a boral Z. Lalmuanzuala leh Lalfakawma te an ui thu leh ram tana an inpekna te chhuanawm an tih thu an tarlang.

Election department in nimin a thuchhuah an siama an tarlan danin, P-2 polling station 149 a duty tur polling party te chuan nimin (5.11.23) khan an duty na tur polling station an pan a, DEO Lawngtlai district hnen atanga thudawnin a tarlan danin, Jarulsury polling station, 36 Tuichawng AC, Lawngtlai district a duty tura chhuakte chuanna lirthei chu Udalthana - I bulah vanduaina tawkin a chesual a, C/278 Z. Lalmuanzuala, 4th IR Bn. chuan vanduaithlak takin nunna a chan a ni.

Nimin tlai vek dar 5:10 khan C/580 Lalfakawma, 2nd IR, Bn. Election duty a Champhai a awm chu District Hospital Champhaiah vanduaithlak takin Pancreatitis vangin a boral bawk.

Election department chuan Election duty laia vanduaina tawka boral Z. Lalmuanzuala leh Lalfakawma te chu uiawm a tiin, ram tana an inpeknate chhuanawm a ti a, an kalsan tak an chhungte thinlung takin a tawrhpui a, hun harsa tak an tawh mek karah Pathianin a awmpuia a venhim zel theih nan duhsakna an hlan.