District ngiat thawm a ring hle a, a nghawng pawh a na chho mek zel a ni, inthlan a hnai tial tial anga a thawm pawh a rin zel a rin awm a, party an buai phaha, nasa takin an inbei tawn bawk a ni. MNF President chuan district ramri te chu mipui duhdanin an siam tur thu a sawi a, Congress lam chu a ramriah lo buai lo turin a chah a. Congress Legislature Party hotu pakhat chuan MNF in district tihpuitlin an tiam chu a ramri sawi chiang ngam turin a phut bawk a ni.   Tunah hian district ngiat/ district a puan tawh a taka ‘function’-tir ngiat hi 3 kan nei mek a Saitual, Khawzawl leh Hnahthial te an ni ber a, politician-ten an vote zawnna lamah an tiam sil tawhte pawh an ni. Saitual district pek loh avangin home minister chuan banna a thehluta a hnuah an party atanga hnawh chhuah a ni bawk a, helai bial hi Chief Minister-in an campaign laiin district function tir a lo tiam tawh a ni.   MNF chuan Khawzawl lamah district pek an tiam tawh a, hemi nghawng hi ni maw, a bialtu MLA ber pawhin a bial a huphurh thu a sawi chhuah mai bakah a awmna party chu tuitang lo takin a sawi zui zel bawk a ni. Tuna kan dinhmun ni bera lang chu a thenin an tiam tawh tihhlawhtlin chu thil namai lo leh hautak tiin chhuanlam an siam a, vote hmuh nan district pek tiam an awm ve leh mek bawk a. A chhunga chengte pawhin an biala ding turte chu district ngiatin politic khelh nan an hmang ve zel bawk a ni. Ngaihtuah chian ngai chu district puan ringawt hi a tawp na niloin a bul tanna zawk a ni a, district entawn tlak a nih leh nih loh thlengin mipuiten an thlir dawn a ni.   District kan duh chhan ber hi chu hmasawn kan duh vang ni berin a lang a, district capital chu thil tam taka thuam tel a lo ngai a chu chuan hmasawnna a keng tel thei anga, mipui tan chuan awlsamna a thlen phah mahna. Mahse tuna Mizoramin district 8 a neihte hi en ta ila, a nihna ang tura thuam an ni hlawm lem lo a, a then hi chu district anga kal tawk tawk an ni ve tho a, district nih hian development tak tak hi thlen lemin a lang lo tlat a ni.   Hemi piah lamah hian kan state ar hmai tiat lek hi district thar han rin belh leh nan a te deuh lo maw? tiin ngaihtuah a ngai ve tho a, state dang dinhmunte pawh hi thlir thiama rilru zau put pawh a tul mai thei. State tam taka district te Mizoram tiat emaw a aia lian te an ni hlawm a, mipui cheng pawh an tam daih zawk a ni a, chuti chung chuan tha takin an la kal ve zel chu a ni a. District chhunga inrelbawlna kengkawhtute hian remhre takin inrelbawlna hna thawk sela, tihtak zetin kan neih ang ang hi hmang thiamin hmang tangkai se hma kan sawn tlan a rinawm ber a ni.   Eng pawh nise, district inpek emaw, inpek leh loh emaw lai hi ram hmasawnna tluantling thlentu a ni ber lo a, inthlan hnaih tawh avanga vote zawnna mai a ni tih hriat nawn a tha a, ram pum huap development hi mipuiten kan buaipui ber zawk tur a ni ang.