Tuna sawrkar term kan hman mek chhungin a tum thum nan 4 Tuirial Assembly Constituency-ah by-election  neih tur a ni a, social media lamah pawh party hrang hrang te chet dan hmuh tur a awm chho ta nak nak a, Local cable TV lam report-ah te pawh hmuh tur a awm chho mek. Hei vang hian Mizoram Peoples Forum (MPF) chuan Election lama zualko a tum ta hial a, eng nge a thlen ang tih erawh sawi a har rih viau.

Inthlan a awm reng reng hian candidate te thil dil emaw, party lama mamawh lo thlen hi mipui lam hian kan ching hle a, ramin a mamawh ni lem lo mahni mimal hamthatna tur zawnga thil lo dil hi khawi hmunah pawh a ching pawl an awm ti ila kan sawi sual lem lo ang. Heng thil hi a chhan ber nia lang chu mipui te bawk kan ni. Mi in vote an zawng a, an vote hmuh theih dan tur an ngaihtuah a, chumi atan chuan eng hmanrua pawh an hmang hreh lo anih chuan sawi theih erawh a ni lo a, chutih rual chuan party worker tam tak te thil tih hi candidate lam hian an hre vek kher lo ve thei bawk.

Tuna MPF te hmalak tum dan pawh hi a nihna takah chuan tun mai ni lo, nakin zela kan ram mipui te sukthlek tur ngaihtuaha ti an ni a, mihring lei theih nih ngawt mai te, mahni mimal hamthatna tur ringawt lo ngaihtuah te hi a dik lo a, thil dik lo hul hual anih avangin hma an la a ni ber a, kut tling lova sum lak that lohna inzirtirna pawh a ni bawk.

A lehlamah chuan kan tih duh loh hi midangin an tih tlat mai si chuan tih ve mai chu thil awlai tak a ni lo thei dawn lo a, vote zawng nih miau chuan kan vote hmuhna tur tih mai chu a awl duh khawp ang. Chutihrualin mahni mihring pui te hlutna erawh kan ti hniam hle a tih theih.

A tawp berah chuan a mipui te bawk hi a thiam lo chu kan ni a, a lehlamah kan khawsak te a lo ziaawm theihna, kar hnih khat tal pawh phang lova awm theihna kha thenkhat tan chuan a thlakhlelh awm lo thei ve bawk. Hei erawh hi chu sawrkar lam hmalakna that tawk loh vang  tih hi hriat reng a tha a, sawrkar tha siam turin mipui te hi a pawi-mawh ber kan ni tih erawh kan hriat reng a ngai.