Tuirial bial bye election zawh takah hneh takin MNF candidate K. Laldawngliana chu thlantlin a ni a, kha inthlanah khan sawi hlawh tak chu sum a leng nasa tih a ni a, candidate pali a pathum te chuan sum an chelek hle tih chu mi tam tak sawi dan a ni a, bial mipui thenkhat te khawsak danah leh campaigner te sawi danah sum hi a leng nasa hle tih a sawi ang.

Kha inthlanah khan a vaibelchhe tel sum sen niin mi tam tak chuan an hria. Inthlanna bial chhung khuaah zu a to  hle tih sawi  a tam hle a, chutihrualin zu in mi zingah sum lakluhna nei lem lo, inthlan bawra rui ni leng thak thak thei an tam hle niin, campaigner pakhat chuan a sawi. Ani hian campaign chu a tih ngai loh thil a nih thu a sawi rualin tun tumah hi chuan an chhungte tamna bial a nih avangin party pakhatin an zinga tel turin an sawm tih a sawi a, khatiang boruak kha a la tawn ngai loh thu a sawi. Hunpui kan hmang hi a ni berin ka hria, a ti a, hei hian helai inthlan boruak hi a tichiang hle. Sum leng tam lo se campaign ngai lo tan a nawmna vak tur a awm lo tlat a ni.

Tun tum inthlah khan tlangthang atanga hriat danin party te hian nuai mai ni lo, vaibelchhe hnih seng te pawh an awm niin an sawi a, hetiang hi a nih chuan kan ram hmalam dinhmun hi a thim hle a tih ngam ang. Sum nei lo tan chuan tlin ngaihna a awm lo a tih theih awm e. Hetiang a nih chuan ram hmangaih ni leh lo, sum nei si hman ngaihna vak hre si lo, nihna duh vanga in-candidate hi hi kan la nei fur ang tih a hlauhawm hle.

Party te hian tlin duh vangin kan mihausa te hi an kochhuak ang a, an ni lamin hmangaihna tak tak awm si lovin ram an kaihruai ang a, dinhmun chhe takah kan awm ang tih hi a hlauhawm tak zet a, zum ngah ngah tlin ang dinhmunah hian kan awm lovang tih a sawi theih lo a, ram inrelbawlna kalphung hre lo Minister te hi kan nei chho mai ang tih a hlauhawm ta hle. Chuvangin mipui lam pawh kan harh a ngai a, chutiang bawkin party lam pawhin sum seng lo thei ang zawnga chet kan lak a hun ta tak zet a ni.