Aizawl; Mizoram in Medical College a dinna tur atana Central in sum a pek vaibelchhe 189 chu Lok Sabha inthlan zawh ah Ministry of Health & Family Welfare chuan a pekchhuah a beiseiawm tih Health Secretary Pu RL Rinawma chuan a sawi. Zalen palaiin a biak naah Principal Secretary, Health department RL Rinawma chuan Mizoram in Medical College a neih theihnan theihtawp an chhuah chungin tih tur tam tak a la awm tih a sawi a. College dinna atan hian ruahmanna an siam te chu Medical Council of India hnen ah an thlen ang a, annin an endik hnuah a dinna atan hian hmalak tan a ni dawn a ni a ti a. Tuna sawrkar laipui sum pek tur vbc. 189 chu College dinna atan chuan a beitham deuh niin a sawi bawk. Mizorama Medical College din phalna hi Ministry of Health & Family Welfare chuan March 3,2014 khan lehkha No. D.O.U 12012/46/2012 - ME (PII) dt. 19.2.2014 hmangin a rawn hriattir a. Medical College dinna tur senso hi Central leh State chuan 90:10 in an intumsem dawn a, College hi Falkawn Referral Hospital ah din tum a ni.