ZALEN March 31, 2026: MNF Legal Board chuan vawiin khan Aizawl Press Club-ah chanchinthar thehdarhtute an kawm a, he hunah hian Treasurer Zothansangi Hmar chuan Inthlan apianga hmeichhe candidate-ten mawi lo tak taka social media-a beih an tawk thin hi MNF Legal Board chuan pawi a ti. Hmeichhiate hmusitnaah an ngaih thu a sawi.

Zothansangi Hmar chuan, "Tun hnaia inthlan kan lo hmachhawn tawh zingah pawh Model Code of Conduct bawhchhiat avanga Election Commission of India thlenga inrawlh ngaia an awm thin hi a pawi hle a. Inthlanna felfai leh thianghlim tak kan neih theihna turin sawrkar lai mek party worker-te hi hmahruaitu tur leh entawntlak ber ni turin Zoram mipuite hian kan phutin kan beisei hle a ni," a ti.

MNF Legal Board Treasurer chuan AMC inthlana hmeichhe ward bakah general ward-a hmeichhia an awm ta nual chu hmasawnna nasa takah MNF chuan an ngaih thu a sawi a, "Hetiang a nih laiin kan hmeichhe candidate-te social media kal tlanga mawi lo tak taka beihna a lo chhuak thin hi a pawi kan ti a. Hmeichhiate dinhmun rahbehnaah kan ngai bawk a ni. A bikin tun hnaiah MNF ten AMC inthlanna lo awm tura Ward- IV-a kan candidate Nl. R. Lalnunthari (Nunui Rualheng) chuan mawi lo tak tak, hmeichhiat mipatna rawngkai leh hmeichhiate zahawmna tibawrhbang thei zawnga beihna a tawk nasa hle a. Hemi chungchang hi kan ngai thutak hle a. Hetiang hi a thleng leh a nih chuan a tul ang zelin MNF Legal Board chuan hma kan la ang. Kan candidate hmeichhiate hi engtiklai pawhin an thlavang hauh turin kan inpeih reng a ni," a ti. 

"Mizoramah hmeichhiate ram hruai turin an lo pen chhuak mek a, hei hi a hlu kan ti a. Amaherawhchu, tuna kan inbeih ang hi chuan hmeichhiate tan politics hi thil tihbaiawmah kan chhuak mek niin a lang a. Tuna kan inbeih dan mawl mang tak tak hian hmeichhe fel, lehkhahtiam, talent nei tha leh zahawm tak tak te a titawmim zo ang tih a hlauhawm hle a ni," a ti bawk.