Aizawl; Mizoram in Lok Sabha MP inthlan felfai taka a neih theih avangin Election department chuan lawmthu an sawi. Nimin khan I&PR Auditorium ah Chief Electoral Officer Ashwani Kumar leh Joint CEO H.Lalengmawia te chuan chanchinbumite an kawm a, CEO chuan, "Mizoram in tluang taka inthlan a neih theihna atana thawktu zawng zawng sawrkar hnathawkte bakah Political party, NGO leh Kohhran te chungah lawmthu kan sawi a. State dangte thlirin Mizoram ah chuan harsatna a thlenglo tluk a ni a, boruak pawh a muanawm tha a, lawmawm kan ti hle a ni," a ti. Press miten model code of conduct bawhchhiatna a awm leh awmloh chungchang an zawhna chhangin CEO chuan Chief Minister Lal Thanhawla leh MoS Lal Thanzara te thusawi ah 'chi leh chi inkara inhuatna (communal) a awm thei' niin mi thenkhat ten complaint an thehlut tih a sawi a. He thilthleng hi chhuizui nghalin Commission lam pawh hriattir an ni a, mahse finfiahna a awm thei lo niin a sawi. Tun tum Lok Sabha MP inthlan senso ah sorkar chuan vaibelchhe 20 budget ah a dah tih Joint CEO H.Lalengmawia chuan zawhna chhangin a sawi a. Vaibelchhe 14 vel chu sem hman a ni tiin a bak vbc.6 chu financial year a tawp dawn avangin Finance department ah pekkir a ni a, dil leh a la ngai dawn niin a sawi bawk.