Mizoram inthlanpui—State General Election chu kan hlat ta lo hle mai, kumin kumtawp mai a lo ni leh ta reng mai a, reilo têah kan thleng leh mai dawn. Eng pawh nise, kan vannei hle mai, kan mi duh zawng, tha leh fel kan thlang thei a. Khing Myanmar ramte kan han thlir chuan kum tam tak mahni duhzawng pawh thlang thei lovin an awm a. Ram mipuiten hrehawm an tihzia chu ram dangah eng pawh inhuamin an pemsan chur chur mai a ni. Keini ramah ngei pawh mi ar in ni awm tak, in chhe deuhah te pawh an rawn awm lawp lawp duh zawk a nih hi. Chuvang chuan zalen taka kan roreltu turte kan han thlang thei hi chu ngaihtuah chiang peih tan chuan a lawmawm ngawt a ni. Vawiinah he inthlan lo awm tur atana party, Kohhran, chhungkua etc. tin pawimawhna lamte han sawi lan tum dawn ila a tha awm e. Inthlan tih hi chu kan hre tlangnel viau hlawmin ka ring. Kohhranah pawh hruaitu tur kan inthlang thin a, Y.M.A.-ah pawh, K.T.P., T.K.P., P.Y.D. etc.-ah te pawh. Khawtlang hruaitu tur, Local Council tih te leh khawpui chhung enkawltu tur, AMC te pawh kan thlang thin a ni. Henga kan han thlan chhuahte mawhphurhna sanzia leh pawimawhzia pawh hi ngun taka kan ngaihtuah chuan kan hre thei ang. Chutiang bawkin he inthlanpui lo awm tur pawh hi heng zawng zawngte ai hian chhut peih tan chuan a pawimawhzia kan hre leh thei ang. Kan ram kal chhoh zel dan tur – education, economy, health, etc. te an kutah a awm dawn a ni. An that chuan hma kan sawn ang a, an that loh erawh chuan chuti hlauh chu kan ni dawn a ni. Hetiang a nih avang hian he inthlanpui lo awm tur hi a pawimawh tawp khawk a ni. Mizoramah pawh mi ram ang bawkin political party tha tak tak kan nei a, Congress, MNF, ZNP, PC etc. te an ni a, hengah hian mi tha tak tak an awm ve teuh a ni. Awle, party tinte an inbuatsaih ta hle mai. Kan policy leh manifesto turte pawh uluk taka kan duan a, ngaihtuah a hun ta. Vote zawn nan ringawta thil kan ti a nih chuan a fuh ber lo vang, nakinah keimahni bawk kha a tuar tur kan ni leh si. Mi zawng zawng khawih – a lian ber atanga tê ber, fel ber leh tha ber thlengin a nih avangin vawiinah party tinte kan pawimawhin kan mawhphurhna a sang hle. Candidate tur chungchang thuah pawh, “Ani hi a hausa deuh a, tawngkam a thiam deuh a,” ti mai mai lovin, mi tha, dik, rintlak tur ngei kan dintir a, thil ti phut phut mai lovin fim takin i inbuatsaih zawk ang u. Kristian ram kan ni a, kan zir loh vang nge, zir vang zawk, kohhran hrang hrang pawh hi kan thahnem hle. Kan hriat danin politics chu a bawlhhlawh, fel lo, inrawlh vena chi a ni lo, kan ti mai thei a; mahse, hei hi a dik lo. Kohhran tha tak chuan tih tur leh mawhphurhna lian tak a nei zawk a ni. Pulpit tlangah te pawh zirtirna pe thei zawk ila; tin, inthlan puala tawngtai rualnate pawh hi tih theih fo a tha hle ang. Vote tur chungchang thuah, “Ani hi chu kan kohhran mi a nih hrim hrim vangin ka’n thlang teh ang,” tih ang chite hi a fel lo hle. Tin, mi tha leh fel tak pawh kan kohhran mi a nih loh vanga hnualsuat ngawt pawh kha a dik lo hle bawk ang. Inthlanpui lo awm tur atan hian kohhran tinten ngaihtuahna fim tak kan hman a, fel leh huaisen taka Bible duh dan leh zirtir dan kan kalpui ngam a ngai bawk a ni. Mizoram mipui zat hi tunah hian nuai 11 vel bawr kan ni a, mi ram ngaihtuah chuan kan la tlem hle. Chhungkua pawh hi awm ve nual tur kan ni a, khawpuiah phei chuan kan tam ve tawh hle ang. Chhungkuaahte pawh sawi ve fo thin ni ta se kan ngaihdan leh party tan zawng te; tichuan, eng ang mi nge tha ang, tih te pawh kan ngaihtuahho thei ngei ang. Kan tan zawng emaw, chhungte nih hrim hrim vang emawa kan vote-te kan thlak chuan a dik famkim thei lo vang. Heti zawng hian han ti leh ta ila, mi tha takte pawh kan party tan zawnga mi a nih loh vang emaw kan chhungte nih loh vanga kan vote lo ringawt a nih chuan a fel lo hle bawk ang. Chhungkua hi a pawimawh a, thil intanna bul pawh a lo ni thin. Party hrang hrangte an rawn campaign leh ang a, an manifesto-te pawh chhiar chhiar theih turin an rawn sem leh dawn a ni, kan inrawn tlan a, ngaihtuahna thiang tak kan hman a tha hle ang. Thu tha tak tak kan sawi a, a then phei chu zawm harsa deuh deuhte an ni. A hun a lo thlen hi chuan rin aiin chet smart-te hi a har duh hle a, kan tum lawk loh dan pui puite hian khawsak a awl duh hle. A tawi zawng in han sawi ta ila, tun atang chuan kan inthlanpui neih leh tur hi a hla tawh lo hle a, party tinte leh mipui lam te pawh ngaihtuahna fim tak nen i inbuatsaih tan ang u.