ZALEN September 25, 2025: Dampa bial By-Election campaign-a thang mek MNF official candidate Dr. R. Lalthangliana chuan khaw hrang hrang a tlawhnaah hian mipui te'n an hmunphiah chin sawrkarin an intiam anga a leisak leh theilo chuan an rilru a tihnat thu an lo hrilh tih a sawi.

MNF sawkar lai khan kg-ah Rs.130/- te, Rs.100/- te in an hralh thei thin a, sawrkar tharah minimum price siam a nih tak avangin man to zawkin an hralh thei ta lova, tunah Rs.40/- leh Rs.30/- lek leka sawrkarin a leisak chu kut hnathawktute hmusit leh rah behnaah an ngaih thu leh heti chung pawha hralh theih loha a tawih ral tam em em tin Dr. R. Lalthangliana hi an lo hrilh a ni.

MNF Sr. Vice President chuan a tling anih chuan MLA term 7 hmanna tur a ni ang a, bial hmasawn nan MLA Fund chauh hmang lovin, heng lai hi aspirational district a nihna hmang ṭangkai thiamin hmalakna tur kawng hrang hrang a awm thei a. Experience a lo neih tawhna leh Central lamah pawh official-te hmelhriat a ngah tawh avangin development ṭhahnem tak a pawh luh theih ngei aa inbeisei thu a sawi bawk.

Dr. R. Lalthangliana chuan nimin khan Marpara, Hruiduk, Pukzing Vengthar, Pukzing, West Phulpui leh Phuldungsei-te a tlawh a. Vawiin hian Phuldungsei, Saithah leh Lallen-te tlawh bawk.