A vawi 4-na atan Pachhunga University College chuan Finishing School chu zirlaite te thla dawn an neih pui hnuah kar hmasa lam khan an zo fel a. He hun hi final semester zirlai te tana buatsaih thin a ni a, a tum ber chu classroom pawna thiamna pek a ni a, chumi thiamna chuan an hmalam hun hneh taka an hmachhawn an beisei pui a ni. PUC Finishing School ah hian class hrang hrang 26 neihpui niin life skills, Mizo nihphung hlutna, interview skills, cooking, self defense, communication skills, human rights class, art, financial management, first aid, disaster management, fitness and nutrition te chu a langsar zual te an ni. Finishing school ah hian zirlaite’n eng emaw zah an chawi a, a bak senso chu College pawisa atangin tum sak an ni thung. Hmun dangah phei chuan hetiang course kal tur hian zirlaite’n cheng Nuai tam tak an seng fo thin a ni. Vawi 4 lai hetiang ang hun lo buatsaih thei tawh PUC Principal leh a thawhpuite hi an fakawm hle a ni. India rama zirna system hrim hrim hian a fawmkim lo hle nia ngaih a ni fo thin a, educationist te’n zirna tluantling an sawi fo thin ‘kil tina zirlai thantir’ tih nen phei chuan inhlat chang a tam thei awm e. India rama zirna In lian leh hming thang te hi a nihna takah sumdawng lian ta deuh vek a ni a, a bikin politician thil ti thei tak tak te an tam hle a. Heng ho rual rilruah hian zirlaite zirna tluantling pek a awm tehchiam lova, sumdawnna lian tak a nih avangin zirlai ngawr ngawr an pawng nek a, ‘marking’ chu a tehfung lian ber a ni hial tawh a ni. State changkang zawk te hemi lamah hian nasa taka an tlan avangin keini a hnufual zawk te chuan an tih dan kan entawn lo thei lova, sikul leh college te chu zirlaiah deuh chauh kan intlansiak emaw tih mai tur a ni ta a ni. Zirlaite an zirlai thiam tir hi kan sel tihna ni lovin zirlaite hian an zirlai an zawh hnu, ‘nun’ an hmachhawn hun tur hi kan zirna In te hian an ngaihtuah thlenpui a va han ngai tawh em! Classroom chhunga an thiamthil te hi chu hna hmuh emaw eizawnna atana bul tanna hmanrua a ni a. An hun tam zawk an hmanna tur ‘nun classroom’ lam hian tunai hian ngaih pawimawh hlawh thei se a duhawm hle mai. A nihna takah chuan zirlaibu chhunga awm lo hmachhawn hian mihring hian a nun tam zawk a hmang a ni zawk a ni. Tuna PUC in Finishing School a buatsaih ang hi college dangteah pawh kang kai thei sela zirlai tam takin nun an hmachhawn huna an tana thil tangkai tam tak an zirna hun a ni si a. Sawrkar lam pawh hian beng chhiin PUC in an kalpui mek ang programme hi ram puma college zirlai te tan zau zawka theh dan ngaihtuah se a tha khawp ang.