Hripui vei zat kan pung zela, a bikin tunhnaiah Aizawl khawpui veng thenkhatah chuan zan khat thil thuah boruak a dang dawrh dawrh a, nasa takin buaina a thlen mek a ni. Khawpui siper hian thingtlang lam a thleng tanin a lang bawk a ni.

Tun- hnaia tual- chhunga hripui inkaidarh thleng ah pawh tam tak chuan lockdown a hmalaka hri darh tur ven an duh a, sawrkar leh mi pawimawh thukhawmte thu ngaihchan thup an nih laiin chutiang lam chu thleng ta miah lo a. Sawrkar lam tan pawh economy hnukhniam zawnga hmalak a har tawh a ni mahna.

Hri kaidarhtu zingah hian a hmatawnga hnathawkte an tel ta mai hi a pawi hle a, heng mite hi an nunna thapa thawk an ni a, fak tur pawh an ni. Sawrkar lam atangin a hmatawnga hnathawkte tan inkaihruaina khauh zawk emaw mumal (standard operating procedure, protocol) emaw fel tak siam lawk a ni loa, engnge maw hat a awm hnuah duan a ni leh a. Sawrkar tan pawh hmalak kim a har tih a lang a, tih kim hleih theih a nih loh chin a awm a ni ang.

Hripui karah VC/LC inthlan kan hmachhawn dawn a ni a, State election commission chuan thuchhuah siamin house to house campaign phalin mi compound leh inchhung luh chu a neitute phalnaah a dah bawk a. Inchhung luh hi khawpui atan phei chuan thil hlauhawm tak niin mipui himna tur zawnpui tura beisei an nih laia mipuia thutlukna a dah daih mai hian sawi a nei a ni.

Eng pawh nise, a chunga tarlan tlemte leh thil dang enin sawrkar hian mipui a venpui seng tawh lo tih a lang reng a, duhthlan tur a tlem ti ila a sual tam pui lo ang a. Khawtlang hruaitute’n theihtawp chhuah mah se, theih loh chin a awm tih hriatpui a ngai bawk a ni. Hei hi mipui lamin an hriathiam a ngai a, Covid 19 darh zel tur venna kawngah mimal a pawi-mawh ber tawh a, fimkhur leh inveng tura zirtirna sawrkarin a pek zawng zawng te kha a taka hman tangkai hun a thleng ta a ni ber e.