ZALEN January 29, 2026 : Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) tangkawp chuan vawiin khan ‘Private sector round table on Mizo Ginger cum Buyer Seller Meet 2026’ Aijal Club-ah an buatsaih a. Horticulture Department Minister C. Lalsawivunga chuan khuallian niin a hmanpui.

Lalmalsawma Pachuau, Secretary, Planning & Programme Implementation Department pawhin Bana Kaih policy chungchang kalkhawmte hnena hrilhriatna neiin, Mizorama entrepreuner leh start up-te tanpuina tur Mizoram Banakaih Venture Capital Fund tlangzarh a nih tawh thute a sawi bawk a.

Buyer Seller Meet-ah hian thawhhona thuthlung pahnih ziah a ni a. Chungte chu –

1. Ropuiliani Farmers Producers Company leh Kisaansay te inkarah Agreement

2. IRMA Iseed leh Mizoram Startup Mission-te inkarah MoU

Vawiinah hian India ram hmun hrang hrang atangin Investors leh Buyers lian tak takte sawm luh an ni a. Chungte chu - NAB Venture, IRMA Iseed, Acumen, ABC Fruits, Rupiya.app, Apple leh NSRCEL te an ni a. Anni hian Mizoram sawrkar nena thlai tharte leh prcessed food-te lei leh hralh kawnga thawhho theih dan kawng hrang hrang rawtna an thlen a. Mizoram-in entrepreneur a neih Zozik, Bio Farm, C Breeze, Tuibawn leh Lawm from the Hills-te nen pawh thawhho theih dan tur sawiho a ni a. Chawhnu lamah B2B session hman niin, Buyer leh Seller-te dawhkan khat kila in kawmna hun neih a ni.