Australian bowler Mitchell Starc chu Indian Premier League (IPL) chanchina player man to ber a ni ta a. Thawhlehnia player lilamnaah Kolkata Knight Riders chuan Rs Vaibelchhe 24.75 (£ maktaduai 2.3) zetin an lei.

Starc hian a hma lawka Rs Vaibelchhe 20.5-a an hralh, Pat Cummins-a an hralhna chu a khum leh nghal a ni.

Cummins hian kum 2022-a Sam Curran hralhna, Rs Vaibelchhe 18.15 khumin Starc hian a khum zui veleh nghal tihna a ni.

England bowler Chris Woakes chu Punjab Kings-ah hralh niin a khelhpui, Harry Brook chu Delhi Capitals-ah a kal ve thung.

Woakes hi Rs Vaibelchhe 4.2 man a nih laiin Brook hi Rs Vaibelchhe 4-a hralh a ni thung a, nikum aiin a man a tlawm zawk.

New Zealand all-rounder Daryl Mitchell chu Chennai Super Kings-in Rs Vaibelchhe 14-in an chang a. Black Caps tana a khelhpui, Rachin Ravindra an la lut tel bawk.

Favang liam taa ICC Cricket World Cup-a che tha tak, Ravindra hi Rs Vaibelchhe 1.8 man a ni.

India-a inelna khelha a champion avang khan Australian player-te hi tun tum lilamnaah hian chhan san an nih rin sa a ni a. An captain leh bowler Cummins-a hi Rs Vaibelchhe 20 man a tling ta reng a ni.

Kum 33 mi, Starc hi IPL-ah hian kum riat zet inlan tawh lo mah se kuminah lilam tura ngaihven hlawh ber pakhat a ni a. A tir lamah Mumbai Indians leh Delhi inlehthal zak zak a, a tawp lamah Gujarat Titans leh KKR an inel chho leh viau bawk.

Kum 30 mi, Cummins hi Sunrisers Hyderabad-in lei ngei tumin an bei nasa hle a, Royal Challengers Bangalore nen an inlehthal nasa hman hle. Sunrisers hian Australian batter Travis Head an chang thei a, ani hi World Cup final-a India an hneh khan man of the match niin Rs Vaibelchhe 6.8 man a ni.

RCB hian West Indies fast bowler Alzarri Joseph chu Rs Vaibelchhe 11.50-a an chan laiin a khelhpui, all-rounder Rovman Powell chu Rajasthan Royals-in Rs Vaibelchhe 7.40-in an chang ve thung.

Mumbai-in South Africa bowler Gerald Coetzee (Rs Vaibelchhe 5) leh Sri Lankan left-armer Dilshan Madushanka (Rs Vaibelchhe 4.6)-in an la lut.

Punjab-in Indian pace bowler Harshal Patel chu Rs Vaibelchhe 11.75-in an la lut.

England opener Phil Salt leh leg spinner Adil Rashid te chu hralh loh langsar an ni a; mahse, nakina lilamah lei leh theih tho an ni dawn.