December 13, 2022; Nakum, 2023 February ni 15 atangin Mizoramah ISI mark chuang lo helmet (Mizoten 'Satel helmet' kan tih mai telin) hman/khum khap a ni dawn a, dan in a khap sa reng ni mahse, tun dinhmunah chuan ISI mark chuang lo helmet khum te man an la ni lo a, hemi chungchang hi naktuk December ni 14 ah Public Notice tih chhuah hman a nih rin a ni.

Aizawl Traffic police hotute hnen atanga ZALEN thudawn danin, India ramah 'India Standards Institute' (ISI) mark chuang lo helmet khum khap sa a ni a, hetihlai hian Mizoramah chuan inhriatthiamna rei tak kalpui a ni tawh. Hetihlai hian tun dinhmunah a ISI mark chuang lo ah pawh a bikin Satel helmet khum kan tam a, chu chu two wheeler khalhtute tan a him loh avangin, nakum 2023, February ni 15 atangin khauh taka 'Enforce' tum a ni a, dan bawhchhia a ISI mark chuang lo helmet khum te chu dan angin Rs. 2,000 chawi tir zel an ni dawn a ni.

Hemi avang hian tun dinhmunah chuan ISI mark chuang lo helmet (Satel helmet telin) khum te chu dan anga man an la ni lo a, tun atangin mipuiah zirna inpe in, mipuite pawh tun atanga an inhmakhua tura beisei leh ngen an ni. 

Tunlaiin Aizawl ah Zero Tolerance Drive/Checking kalpui mek a ni a, social media lamah ISI mark chuang lo hrim hrim man an nih dawn thu te leh Mizoten kan leklam tak Satel helmet khum te pawh man zel an nih tur thu a darh a, hemi vang hian mi tam tak an chiai a, helmet zawrhna dawrte pawh a lun phah nia sawi a ni.