Aizawl: Tun hnaiah ISIS hoin Bangladesh atanga Mizoram an lo lut tawh anga Social Media-a thu vawrhdah chu thu belhchian dawn lo a nih thu Mizoram Police hotuten Zalen palai an hrilh. Police hotute chuan he thuthang hi tun hnaia Bangladesh khawpui Dhaka-a pawikhawihna thleng kaihhnawih atanga lo irhchhuak nia an hriat thu Zalen palai hrilhin,'mipui tan chiai phah nachhan tur a ni lo'an ti a. Hetih rual hian Mizoram chu ram ralmuang a nih avangin an lo lut lovang tih sawi ngawt theih a ni bik lo nia an hriat thu sawiin, mipuite chu an theihna kawng kawngah fimkhur turin an ngen. Subsidiary Intelligence Bureau (SIB) hotute pawhin Mizorama IS lo lut tawh anga sawi chu thudik lo a nih thu an Zalen palai an hrilh a. He thuthang hi khawi atanga lo irhchhuak nge an hre bik lo niin an sawi a. SIB hotute chuan hetiang thu hi lo hria pawh ni se Media ah vawrh darh lo in State Police ah emaw a venna kawnga hmalatute hnenah an hriattir thin thu an sawi a. He thuthang hi an kut atanga chhuak a nih loh thu an sawi bawk.