ZALEN August 29, 2025 : Iskut tharchhuahin in tlakhniam lam zel a pan chungchang zirchianna Mission Foundation Movement in Research Report an buatsaih chu vawiin khan Agriculture & Farmers’ Welfare Minister PC Vanlalruata’n a pisaah ah a tlangzarh. Minister chuan Iskut chungchang zirbingna report a awm thei chu lawmawm a tih thu a sawi a.

Durtlang, Sihphir leh Lungdaia Iskut thar a lo tlem tial tial nachhan zirchianna hi Ministry of Tribal Affairs, TRI scheme hnuaiah cheng nuai 25 senga Social Welfare Department kaltlanga thawh a ni a, kum 1 chuang he zirchianna hi kalpui a nih thu Lalramchuanzela, Executive Director, MFM chuan a sawi a ni.

Project Coordinator HL Lalrinawma’n report a pe a. Sihphir, Durtlang leh Lungdaiah hian Iskut tam tham tak tharchhuah a ni tawh thin a, state pawnah te pawh thawnchhuakin chhungkaw tam takin eizawn nan an hmang thin. Amaherawhchu, kum 10 kalta vel atang khan Iskut tharchhuah hi a tlem tial tial a, tun hnaiah phei chuan a zuih ral ti tih hial a ni.

He zirbingna in a hmuchhuah tlangpui te chu –

1. Ram leilung te hi a thur deuh vek a, al a tam a, leiin a tui pai theihna a tlahniam

2. SOC (leia thil tawih awm) a tlem tial tial a

3. Thlaiin an mawhmawh (NPK ) duh khawp an pai lo

4. Rannung in a tichhe nasa hle bawk.

Heng te hi a chhan langsar zual a ni :

1. Sik leh sa inthlak in a nghawng

2. A chinna hmun a awih vang

3. Chemical fertilizer an lo hmang nasa tawh a, tihtawp thut a nih vang

4. Technical Training mumal an dawng tam tawk lo

5. Hun rei tak a hmun ngaiah chin thin a ni a, soil testing neih loh avangin farmer ten an lei dinhmun an hre chiang lo

6. Tui an tlachham

Project Coordinator hian hmalak zelna tur (recommendation) point hrang hrang a tarlang bawk a ni.

He research ah hian Agriculture & Farmers’ Welfare Department, KVK lengpui, ICAR Kolasib leh Mizo Iskut Growers Association(MIGA) te pawhin nasa takin an pui a ni.