India ram league sang ber Indian Super League khelh mek chu Pathianni zan khian final khelh a ni dawn a, final khel tur zawnnaah nizan khan Yellow Army chuan an dinhmun ching felin semi-final first leg-a si khat faia an hneh hnu Kerala Blasters chu inhnehtawk pui mahse, aggregate-ah 2-1 a nih vangin Blasters te hian a vawi thum nan Indian Super League final an lut. He inkhelhah hian Blasters tan Adrian Luna chuan goal a khung a, Jamshedpur tan Pronay Halder chuan a khung ve bawk. Kerala Blasters tana goal thuntu Adrian Luna chu hero of the Match-ah thlan a ni. 

Final lut tawh Kerala Blasters hian final-ah zanin a inkhelh tur ATK Mohun Bagan leh Hyderabad FC atanga tlang zawk zawk  an hmachhawn ang. First leg khelh tawhah Hyderabad hi chungnung zawkin 3-1 ngawtin hma an hruai a, Mohun Bagan lam tan chuan lehthal a huphurhawm tawh hlein a rinawm. 

Inkhelh banah Luna chuan,"Zanin hian ka hlim tak zet zet a ni, fans leh team chungah ka lawm tak zet a, hun rei tak kan nghah hnuah final kan lut thei a, finalah pawh kan chak nei ka ring a ni. Kan chak hi ka hlima ka inchhuang hle bawk a ni," a ti. Kerala Blasters Head Coach, Ivan Vukomanovic chuan,"Final luh hi thil ropui tak a ni. Club chhunga mi tu pawh mai hi an inring tawk em em mai a, messages chhan sen lo Kerala fans te atangin kan dawng bawk. Champion ngei turin thei tawp kan chhuah ang," a ti.