Zirtawpni zan Athletic Stadium, Bambolim-a India Premier League inkhelhah Hyderabad chuan an hmahruaina point 3 a belhchhah turin 2-1 in Bengaluru an hneh. 

He inkhelhah hian India leh Bengaluru captain Sunil Chhetri chuan goal khungin ISL-a a goal 50-na a thun a, Bartholomew Ogbeche record siam khumin ISL-a goal thun tam ber a ni. Indian zingah chuan Chhetri hi goal thun tam ber a ni sa a ni.  

Tunah hian table lama  hmahruaitu Hyderabad hian point 4 chauhin hma an hruai a, chutih laiin pahnihnaa awm mek Jamshedpur aiin match hnihin an khelh tam zawk a, point 6 lai hmuh belh thei an la nih vangin Jamshedpur lam hian leh pelhna hun tha an la nei a, table hmahruaitu pawh hi a danglam thuai thei a ni. Indian Super League (ISL) champion tur inhrui pawhna a kal chho rih mek zel. 

Inkhelh tan tirh phat atangin Manolo Marquez-a naute Hyderabad lam hian an nawr na nghal hle a, minute 16-na lekah Javier Siverio chuan goal hmahruai a thu a, first-half tawp hma minute 30-ah Joao Victor chuan an goal hnihna thun lehin goal hnihin hma an hruai, mahse Marco Pezzaiuoli-a nau ten tlawm mai an tum lo, theih tawpa nawr let vein hun tawp dawn lamah Sunil Chhetri chuan mawi takin a ke dinglam hmangin minute 87-naah goal a rawn thun ve leh a, theih tawp chhuah zui mah se goal dang luh belh lovin hun a tawp. 

Chhetri hian game 11 chhung zet goal a khung tawh lo va, zirtawpni zan inkhelh hmaa FC Goa nen an inkhelh tumin a khung ve leh thei chauh a ni.