ZALEN April 16, 2025 : I-League-a footballer che tha, Aizawl FC forward Lalrinzuala chuan India ram football league sang ber ISL club Northeast United zawm turin inremna a siampui.

Aizawl FC striker hian tun thla tawp thleng a khelhna club-ah hian contract a nei a, a contract neihlai a zawh rualin Northeast United FC ah hian a inziaklut nghal ang.

Lalrinzuala hian tun I-League season ah goal 15 thunin assist pathum a nei a, I-League-a India chhulchhuak player te zinga season khata goal thun tam ber record Sunil Chhetri (2013-14) leh Mohammed Rafi (2009-10) an intawm chu a rawn lehpel thei a ni.

Goal a thun theih em avangin India coach kalchhuak ta Igor Stimac chuan India team camp-ah a ko hial a ni.

I-League season kal mekah relegate mai tura ngaih Aizawl FC hi Rinzuala hian a chhanchhuak a tih ngam hial a ni.

I-League-ah hian Rinzuala aia goal thun tam chu India ram pawnlam mi David Castaneda Munoz (Sreenidi Deccan) and Douglas Rosa Tardin (Shillong Lajong) te chauh an ni a, hei vang hian Rinzuala statistics hi India ram football chhut mite chuan an dahsang hle a ni.

India ram chanchinbu lian Times of India (TOI) in a tarlan danin Rinzuala hian Mohun Bagan leh Jamshedpur FC te hnen atangin sawmna a dawng a, Mumbai FC pawhin an ngaihven hle niin an ziak bawk.

ISL club zingah Northeast United coach Juan Pedro Benali hi player thar enchhin huaisen ber nia sawi a ni a, hei vang hian Rinzuala hian Northeast United hi zawm niin TOI chuan a sawi.

Rinzuala hi Bengaluru FC academy chhuak a ni a, an club CEO Mandar Tamhane leh assistant coach Naushad Moosa nen pawh an in hnimhnai hle niin TOI chuan a ziak a, Bengaluru pawh hian an ngaihven hle niin an sawi.

Rinzuala hian Bengaluru FC U-16 leh U-18 youth team tan 2017-19 chhung khan a khel a, Gokulam Kerala-ah insawnin chumi hnuah Chhinga Veng FC ah a khel leh a, 2023 khan Aizawl FC a zawm a ni.