2023-24 Hero Indian Super League (ISL) atan club tam tak an inbuatsaih mek a, tunah hian nipui bazar inhawng mekin player lut leh chhuak an tam a. Football thiam state, Mizoram player pawh a che pawlah an tang nual mai.

India ram puma season liam taa ball pet thiam ber neitu, Mizoram hian ISL-ah hian player an thawh sa nual a, season tharah pawh an thawh leh nual dawn.

Nipui bazar hi June 9 atanga hawn tan kha niin August 31 thleng a bazar theih dawn a. Season thar hi September thlaa tan tur a ni a. Tunah hian Mizo player, an khelhna hmun sawn turte thlir bing ila, bazar hun a la tam avangin la che dang pawh an la awm thei.

Jamsedpur atangin Odisha-ah Dinliana
Jamshedpur FC chuan June 21 khan Laldinliana Renthlei chu a contract hmang zovin an chhuahtir tih an puang a, Odisha FC-in an la lut nghal.

Mizo tlangval kum 24 mi hi 2021-22 season-a Jamshedpur-in ISL Shield an laknaah khan player thawh hlawk ber pakhat a ni.

Full-back Dinliana hi kum 2020 nipuia Jamshedpur FC a zawm atang khan an player hman rim ber pawl a ni nghal a, a theihna leh inpekna chu a club tana hlu tak a ni a. Kum thum a awm chhungin Men of Steel tan vawi 56 inlanin a thiante goal thun tur vawi hnih a siamsak.

Jamshedpur a chhuahsan rual hian Dinliana hi Odisha FC-in an lak thu an puang nghal a. Juggernauts hian a hmain player dang an la lut nual tawh a, tlarhnunga tawnhriat nei tha tak an neih belh leh ta tihna a ni.

Liansanga pawhin Odisha zawm
Odisha FC chuan Rajasthan United FC atangin midfielder Lalliansanga Renthlei an la lut a, July 2 khan Mizo tlangval an lak luh thu hi social media-ah puangin kum thum daih contract an ziahpui.

AIFF Elite Academy chhuak, kum 24 mi, Liansanga hi Rajsathan United-ah a theihna a lantir tawh a, Kalinga Warriors-in an la lut hi a team thar tan pawh hlawk tak ni tura ngaih a ni.

Liansanga hian kum 2017 khan Chennaiyin FC Reserves zawmin professional bul a tan a, a theihna hmuin mi mit a la nghal a, Indian Arrows chuan an seng lut ta thuai a. Sudeva Delhi FC-in hmu fuhin an la lut thuai a; mahse, bench-ah hun tam tak a hmang a, chu chu Rajasthan United-in uiin an la chhuak a, reilo teah hmun nghet a chang zui ta a ni.

Kalinga Warriors coach Sergio Lobero chuan Liansanga an chang thei chu a phur hle tih a sawi a, “Tun atan leh nakin atana central midfielder tha a ni a, ani nena kan thawhho chuan kan tum kan hlenna turah min pui ngei ang,” tiin a sawi.

East Bengal-ah Peka Guite
East Bengal FC chuan Zirtawpni kal ta khan India U-17 national team player pahnih an la lut a, pakhat zawk hi midfielder Vanlalpeka Guite a ni a, I-League club Aizawl FC atanga an lak luh a ni a. A rual hian Gurnaj Singh Grewal pawh Red & Gold Brigade hian kum eng emaw zat chhung atan an la lut.

East Bengal FC chhungkuaa mi, Emami Group-a hotu, Sandeep Agrawal chuan, “Guite leh Gurnaj te hian India U-17 team tan tawnhriat tha tak an lo nei tawh a. East Bengal hmabak zela kawng sialna tur an ni a, anni nen hian kawng dik kan zawh zel ang,” a ti.

Head Coach Carles Cuadrat-a pawhin Peka leh Gurnaj-a hi  AFC U-17 Asian Cup khel tura inbuatsaih nana India U-17 team-in Spain-a hun an lo hman laiin a lo hmelhriat tawh.

“Thla rei vak lo liam taah khan Madrid-ah India U-17 team an lo kalin ka hmu tawh a, an khelh dan leh team tana an inpekna avangin ka mit an la dun hle a. Kan tan naupang zawkte theihna pho chhuahna pawimawh tak anni dawn a, East Bengal pawhin tha leh zual ni turin a pui ang,” a ti a. “FC Barcelona-a La Masia atanga lo kal ka ni a, thalai hlu tak takte tana remchanna siamsak tur hian ka inpeih reng a ni,” a ti bawk.

Mizo rawlthar, Peka Guite hi SAFF U-17 Championship-ah khan India tan inlanin Most Valuable Player-ah thlan a ni a. Kumin kumtira AFC U-17 Asian Cup-ah pawh attacking midfielder hi a thawhhlawk hle bawk.

Kum 16 mi chauh la ni, Peka chuan, “East Bengal tana ka khel tur hi ka tan chawimawina a ni a. Coach Cuadrat leh upa zawkte atangin ka theih ang tawka inzir ka tum dawn a, club ropui tak tan hian theihtawp ka chhuah ang,” a ti.

Odisha-ah Jerry
Jerry Lalrinzuala chu East Bengal-in player 11 an chhuah zingah a tel a, a contract hmang zo a ni a, Dinliana leh Liansanga te nen Odisha-a khelho turin a kal nghal.

Mizoram Premier League-a Bethlehem Vengthlang FC defender thin, ISL-a Chennaiyin tan pawha lo khel tawh, Jerry-a hi season liam ta khan Red & Gold Brigade tan vawi 19 a inlan.

Metz, France-ah pawh thlan bik player tlem training tura tel pha, kum 24 mi, Jerry-a hi India tan pawh Under 17, 20 leh 23-a a inlan hnuah senior team tan pawh vawi kua a khel tawh a ni.

North East-in Sialhawk tlangval chhuah
Mizorama Inter-village leh Inter Branch YMA intihsiaknaa khaw thawm na tak, Sialhawk forward Laldanmawia chu North East United FC-in contract hmang zo player pariat an chhuah zingah a tel.

Kum 30 mi, Danmawia hi 2021-22 season tan dawna Hyderabad FC atanga an lak luh kha niin inelna hrang hrangah vawi 21 a khelhsak hman a, goal li thunin a thiante goal thun tur vawi khat a siamsak bawk.