- J.Lalramnghaka(Jeru-a) Islam tih hi Arabic tawng a ni a, a awmzia chu Mizo tawng chuan ‘muanna kaltlanga Pathian tana inpumpekna’ tihna a ni mai awm e, Islam sakhaw zuitute chu ‘Muslim’ tia hriat an ni a, a awmzia chu ‘Pathian tana inpumpekte’ tihna a ni. Abrahamic Tradition Pathum zinga pakhat a ni a, Abrahamic Tradition dangte chu Christianity leh Juda Sakhuate hi an ni. He sakhaw dintu Muhammad hi A.D 570-ah piangin, tuna Saudi Arabia-a Mecca-ah he sakhua hi a din a, Muhammad hi fahrah niin sakhaw lam hi a tui em em a, a bikin Juda leh Kristian sakhua hi a zir nasa em em a, Islam sakhua pawh hi Kristian leh Juda sakhaw kaihkawp a ni ber. Mahse, Muslim chuan Islam sakhua chu Muhammad-a din ni loin, a tir atanga sakhaw hmasaber, Adama hunlai atanga mi tawh a ni an ti thung. Muhammad hian kum 25 a nihin a aia kum 15-a upa nupuiah a nei a, kum 40 a nihin Vantirhkoh Gabriela hnen atang inlarna dawngin an sakhaw lehkhabu ‘Holy Quran’-a thute pawh hi Vantirhkoh Gabriela hnen atanga a dawn ni a sawi a ni a; mahse, mak deuh mai chu Muhammad hian ziak leh chhiar a thiam lo a ni. Muslim-te hian innghahna bulpui thurin 5 an nei a, chungte chu: 1. Allah chauh Pathian a awm a,engkim hi a siam a ni a,a duh dana thleng a ni a, Quran-ah hian Allah (Pathian) hming hi chi hrang hrang 99-in a inziak a, a vawi 100-na chu thuruk a ni a, a lokal leh hunah chauh hriat a ni dawn a ni. Quran-a Allah(Pathian) hming/­nihna inziak langsar zualte chu: zahngaihna-a khat, engkim hria, venghimtu, petu, a hmasaber leh hnuhnungber tih te a ni. 2. Pathian (Allah) chuan mihringte hnena thu puanchhuah nan Zawlnei a nei a, zawlnei 28 an awm a, zawlnei hmasaber Adama niin, a hnuhnungber leh ropui ber ni bawk chu Ahmad-a, Muhammad tia hriat hi a ni. 3. Muslim-te chuan Thuthlung Hlui te, Isua Chanchin tha te hi an ring vek a; amaherawhchu, khang­ original-te kha a bo avangin Muhammada hnena Gabriela’n a pek Quran chu a kimchang leh engkima engkim a ni a, Quran-ah hian Suras (bung) 114-a awm a,an rindan chuan Quran thu zawng zawng hi Pathian thu a ni vek a, chu chuan an nun a kaihruai a, Muslim ram thenkhatah chuan an ram Constitution atan Quran an hmang hial a ni. 4. Angel fel leh sual an awm a, Angel fel hotuber chu Gabriela niin, a sual hotuber chu Satana a ni. 5. Khawvel tawpah rorelna ni a la awm dawn a, mi sual tan meidil, mi fel tan vanram a awm dawn a ni. Tin, Muslim-te’n an dam chhunga an tihtur te chu: Allah chauh Pathian atana biak tur a ni a, mi rethei leh Islam sakhaw tan Sawma pakhat pek tur, ni khatah Mecca lam hawi zawngin vawi 5 tal tawngtai tur, kum tin thla 9-na chhung zawng khaw en chhungin engmah ei a in loh tur; tin, vawi khat tal Mecca-ah kal tur a ni, mipa Mecca-a kal te chu ‘Haj’ an ti a, English-ho ‘Sir’ title ang hi a ni mai. Tin, Jihad (Indona­ thianghlim)-a thite chu vanram kai ngei turah an ngai bawk. An zirtirnaah chuan Isua hi zawlnei pakhat a ni a; amaherawhchu, ‘Isua hi Pathian a ni’ tih emaw ‘Pathian fapa a ni’ tih emaw hi Islam sakhaw tihbawrhbanna a ni. Tin, Johana 14:16-a Isuan, “Tin,Pa ka dîl ang a, ani chuan Thlamuantu dang a pe ang che u, chatuana in hnena awm turin,” a tih kha Muhammad-a a sawina a ni an ti a, Muhammad hi Thlarau Thianghlim niin an ring bawk. Tin,Kraws-a thi kha Isua ni loin Juda niin an sawi bawk. Muslim mipate chu khup khuh lo thawhnaw hak khap a ni a, hmeichhiate pawh an taksa ruangam lang thei thawmhnaw reng reng hak khap a ni a, chu chu mipa sual leh Setana hnathawh laka an himna tur niin an ngai. Tin, Quran hian mipate chu nupui 4 an neih a phalsak a ni. Sakhaw dang chu Science nen an inrem loh laiin Islam sakhua chu a inrem hle a, Atom leh Nucleus chungchangte, ruah insiam dante hi Scientist-te’n an hmuhchhuah hmain Holy Quran-ah hian a awm vek a ni. Tin, Muslim tam tak chuan Sakhua leh Politik hi lak hran theih loh niin an ngai. Tin, Islam sakhaw zuitute hian an thil neih atanga 2.5% hi chhiah angin mi rethei hnenah an pek a ngai a, he thilpek hi an sakhaw tih hmasawn nan hman phal a ni lo a, mi retheite hnenah chauh pek tur a ni a, sakhaw dang zuitute hnena pek pawh a thiang a ni. Hetiang chhiah hi sakhaw dang reng rengah a awm ve lo a ni. An hmunpui ber chu Mecca-ah a awm a, Islam hi chi 3: Sunni, Shia leh Ahmad an awm a,khawvel pumah Muslim 1.6 billion awmin, khawvel mihring 23% hi Muslhm an ni a,sakhaw lian 5 zinga a naupang ber hi khawvela sakhaw thang chakber a ni. Islam sakhua hian tharum thawhna a thlawp lo niin an sawi a; amaherawhchu, polit­ik leh sakhua chu mimawl apiangah a thawkna tih ang deuhin khawvel buaina zawng zawng deuhthaw hi an chawhchhuah a tih theih awm e. Mizoramah pawh an thahnemin, lammualah an bungbu var suau suau zel a nih hi.