Aizawl; Lengte-a Ispat Industry Pvt. Ltd.-a an chemical êkchhia (slag & mill scale) thehthang danah thil fel lo awm nia a hriain MSU hruaituten nimin khan an enfiah a, Ispat hotute an kawm nghal bawk. He industry-in mihring tana hlauhawm thei (chemical) êkchhia paih dan te uluk taka enin, tun dinhmunah la hlauhawm rih lo mah se, hun lo kal zel turah a hlauhawm dawn nia an hriat avangin Chief Executive Officer, Roshan Agarwal hnenah mumal taka chemical êkchhia paihna tur siam turin an hriattir a, CEO hian an siam nghal tur thu a lo hrilh niin thu dawn a ni. MSU hruaitute chuan industry thli/êkchhia (slag) chu kawngpui hnawh nana hman a ni a, mahse, a dahkhawlna siamna tur dân a awm loh avangin hmun remchang laiah dahin kawngpui hnawhna tura hman tlak lohte chu a bul velah an paih tawp mai niin an sawi a. Hei hi thil hlauhawm tak a nih avangin thli chhia dahkhawmna siam tur leh a hmantlak tawh lohte pawh mumal taka tiriral turin a ngen a, CEO chuan slag siamna mumal tak siam nghal a nih tur thu a sawi a ni, an ti. Hei bakah hian êkchhia dahkhawlna tura tih pawh Ispat hian an zawm lo a, 'mill scale' dahkhawmna tur siam a nih loh bakah kawng sir remchangah dah tawp a ni a, hei pawh hi a dahthatna siam nghal turin an hrilh bawk a ni. Chief Executive Officer hian MSU hruaitute hi tha taka lo dawngsawngin, MSU-in ti tura a ngennate a rang thei ang bera tihlawhtling turin a intiam niin an sawi a, hnathawh dan hi ngun takin MSU chuan a en thlithlai zel dawn dawn tih an sawi. "Industry-a chemical êkchhia hi mumal taka tihriral a nih loh chuan mihringte tan leh nungchate tan a hlauhawm em em a, heng chemical êkchhia avangin India rama lui engemawzat chu thil nung chênna tlak lohin lui thi-ah a chang tawh a ni," MSU thuchhuah chuan a ti a. Sorkar thuneitute chu he thil hi ngaithah lo tur leh, dân an siamte pawh zawm a nih leh nih loh en zui zel turin a ngên bawk a ni.