Aizawl June 21, 2023 : Indian Youth Congress (IYC) Secretary, Mizoram leh Manipur viltu Sarifa Rehman chuan vawiin khan Congress Bhawan-ah Mizoram Press mite a kawm a, Mizoram mipui ten Manipur-a raltlante a ngaihsak dan chu lawmawm a ti. Manipur a tlawhchu Manipur Congress hotu lam chuan an lawm vak lo niin Manipur tlangram lama an party mite bulah a sawi.

Vawiina press mite a kawm naah hian Sarifa Rehman chuan Lamka a thlen hnuah thil awmdan a hmuhin Mizoram mipui ten Manipur lama harsatna tawk te an ngaihtuah zia a hmuh thu a sawi a, Mizoram mipui te hnenah lawmawm a tih thu a sawi a ni. IYC Secretary hian Manipur-a buaina thleng chungchangah Prime Minister Narendra Modi kaihhruai BJP chuan hma an la tha tawk lo a tih thu leh Congress chuan theihtawp an chhuah zel tur thu a sawi.

Sarifa Rehman hian Thawhtanni khan Lamka a Manipur raltlante a tlawh a, IYC leh Mizoram Congress te tangkawpin raltlante mamawh tur an thawn chu a hlan a, he hun a tlawhnaah hian Congress Party chuan an theih tawpin hma an lak tur thu a sawi a, a khat tawka tanpuina pek an nih tur thu a sawi. Congress Thalai hruaitu chuan Manipur tlngmi chanchinbu mi ten an kawm naah an dinhmun thlirin Presidents Rule hnuaia awm tura nia a ngaih thu a sawi bawk a ni. 

Manipur a tlawh tum hian Churanchanpur District Congress Committe te nena an inkawm naah tlangmite chenna lam a tlawh tur chu Manipur Pradesh Congress Committe chuan an lawm vak lo tih a sawi, tih Congress Worker pakhat chuan a hmuna kal ZALEN a hrilh. Sarifa Rehman hian thil awmdan a hmuhin ngaihdan a neih thu a sawi, a ti bawk.

Manipur Pradesh Congress Committe te chuan thil thlen dan hi Delhi lama an hortute hnenah an report tawh a, he report hi tlangmi lama Congress te chuan dik tawk lovin an hria a, naktuk lam hian an hruaitu pakhat chu Congress President leh Rahul Gandhi hmuh tumin Delhi a pan dawn niin ZALEN chuan thu a dawng bawk.