Korean boy band lar BTS-a an member J-hope chuan hla thar a tichhuak a, a hla title hi 'More' tih a ni - sap hla thenkhat hi chu Mizo tawnga lehlin tum phet chi pawh a ni lo, a ho dawn riau!

Kum 28 mi J-hope hian album a tichhuak dawn a, chuta a hla pakhat chu a rawn tichhuak lawk a ni ber. A album thar tur hi 'Jack In The Box' tih a ni a, July 15-ah a release ang. Full album hi July 15 atangin streaming service hrang hrangah chhawpchhuah a ni ang a, Weverse Albums kaltlangin July 29-ah tihchhuah a ni bawk ang. 

Korean boy band lar BTS hian tun hnai khan band anga an chet chhuah rih loh tur thu an puang a, engtik niah em maw chuan a huhoa an rawn inlar leh tur thu erawh an sawi thung. An agency HYBE chuan, "He group hian mimal hmasawnna an neih belh zel theih nan mimal zinkawng an zawh rualin team angin an thawkho chhunzawm zel dawn a ni. An member te chu solo album tihchhuah phalsak an nih bakah artist dangte nena thawhho pawh remtih sak an ni," tiin an tarlang. 

HYBE parent company BIGHIT MUSIC chuan, "BTS hian tunah hian solo project thar bakah group project hmangin bung thar a kai chho mek a, activity thar hrang hrang hmangin mimal hmasawnna an neih theih nan hma an la mek a ni," tiin an tarlang ve bawk. J-hope hma hian BTS member Jungkook chuan June 12 khan single ‘My You’ a lo tichhuak tawh bawk a ni.